ސަރުކާރުން ރޯދަ ހަދިޔާގެ ގޮތުގައި ދޭ މަސްދަޅުކޭސް ދޫކުރައްވަން ފެއްޓެވި ފުރަތަމަ ރޭގައި ޖުމުލަ 9،394 މަސްދަޅުކޭސް ދޫކުރެވިފައިވާ ކަމުގައި، ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

ރޭ މަސްދަޅު ކޭސްތައް އާއްމުންނަށް ދޫކުރަން ފެށި އިރު ކިޔޫބޮޑުވުމުގެ ސަބަބުންނާއި އިންތިޒާމްތައް ގޯސްވުމުގެ ސަބަބުން އާއްމުންގެ ނުރުހުމާއި ފާޑުކިޔުން ސަރުކާރަށް ވަނީ އަމާޒުވެގެން ގޮސްފައެވެ.

މާލެ ސަރަހައްދުގެ 45000 ވުރެ ގިނަ ގޭބިސީ ހުންނައިރު، މަސްދަޅުކޭސް ދޫކުރަން ކަނޑައެޅީ މާލެ ސަރަހައްދުން ފަސްތަނެކެވެ. އެކަމުގެ ސަބަބުން ކިޔޫތައް ދިގުވެ ތޮއްޖެހުން ބޮޑުވެގެން ދިޔައެވެ. ރޭ ގެ ފަތިހު 4 ޖެހި އިރުވެސް މާލެ އާއި ހުޅުމާލޭގެ ބައެއް ތަންތަނުން މަސްދަޅުކޭސް ދޫކޮށް ނިންމާލެވިފައެއް ނުވެއެވެ.

މާލެ ސަރަހައްދުން މަސްދަޅުކޭސް ރޭ ދޫކުރީ، ހުޅުމާލެ ފޭސް 2 ގެ ހިޔާގެ 10ވަނަ ޓަވަރުންނާއި، ހުޅުމާލެ ފޭސް 1ގެ އުމަރު ޒާހިރު ބިލްޑިންގ އިންނާއި، މާލޭގައި އެމްޓީސީސީ ސޯމިލް އަދި މާލޭ މިފްކޯގެ މައި އޮފީސް ހުންނަ އިމާރާތުގެ އިތުރުން ވިލިމާލެއިންނެވެ. ރޭގެ ތަފާސް ހިސާބުތަކަށް ބަލާއިރު އެންމެ ގިނައިން މަސްދަޅުކޭސް ދޫކޮށްފައި ވަނީ މިފްކޯގެ މައި އޮފީސް ހުންނަ އިމާރާތުގައި ހުންނަ ފިހާރައިންނެވެ. އެތަނުން 3666 ކޭސް މަސް ދޫކޮށްފައިވެއެވެ. ދެވަނައަށް އެންމެ ގިނައި މަސްދަޅުކޭސް ދޫކުރީ އެމްޓީސީސީ ސޯމިލްއިންނެވެ، އެތަނުން 2083 ކޭސް މަސް އާމުންނަށް ދޫކުރިއެވެ.

މަސްކޭސްތައް ބެހުމުގައި ރޭގައި ކުރިމަތިވި މައްސަލަތަކަށް ބަލައި މާދަމާ މަސްކޭސް ދޫކުރަން އިތުރު ސަރަހައްދުތައް ހަމަޖައްސާނެ ކަމުގައި މިނިސްޓަރ އާދަމް ޝަރީފް އުމަރު ވަނީ ވިިދާޅުވެފައެވެ.