Amalu thakigai ikhlaastherivun

28 Apr 2023

ދީން

ޢަމަލުތަކުގައި އިޚްލާޞްތެރިވުން

އަހަރެމެން އެތާނގެ މަތީގައި ދިރިއުޅޭ މި ބިން, މާތް الله ވަނީ އަހަރެމެންނަށްޓަކައި ކިޔަމަންކޮށް ދެއްވާފައެވެ. އަހަރެމެން ދިރިއުޅުމަށް ބޭނުންވާ ކަންޒުތަކާއި, ބާރުތަކާއި, ހަކަތަތަކާއި, މުއްސަނދިކަން އެ ބިމުގެ ތެރޭގައި ރައްކާކޮށް ދެއްވާފައި ވެއެވެ. އިންސާނާގެ މައްޗަށް އޮތީ, މި ތަކެތިން ފައިދާ ލިބިގަތުމަށްޓަކައި, އިޚްލާޞްތެރި ކަމާއެކު މަސައްކަތް ކުރުމެވެ.

އިސްލާމްދީނުގައި ޢަމަލުތައް ޤަބޫލުކުރައްވާނީ, الله سبحانه و تعالى‎ ގެ ވަޖްހުފުޅަށްޓަކައި ކުރެވޭ ކަމަކަށް ވާނަމައެވެ. الله ގެ ޙަޟްރަތުން ދަރުމައަށް އެދި, އެއްވެސް ކަންދެއްކުމެއް ނެތި, އިޚްލާޞްތެރިކަމާއެކު އެކަމެއް ކޮށްގެންނެވެ. މިކަމާއި ގުޅިގެން ރަސޫލު الله صلى الله عليه وسلم ހަދީޘް ކުރެއްވި ބަސްފުޅެއްގެ މާނައިގައި ވެއެވެ. "ހަމަކަށަވަރުން ޢަމަލުތައް ބިނާވެގެން ވަނީ ނިޔަތުގެ މައްޗަށެވެ. ހަމަކަށަވަރުން ކޮންމެ މީހަކަށްމެ, އެމީހަކު ނިޔަތްގަތްކަމެއް ލިބިގެން ވެއެވެ."

ދުނިޔޭގެ އަރާމާއި, ނަފްސުގެ ބައެއް އެދުންތަކަކީ ވެސް, ރަނގަޅު ހެޔޮ ނިޔަތެއްގައި ކުރެވިއްޖެނަމަ, الله ގެ ޙަޟްރަތަށް ކުއްތަން ކުރުވަނިވި ޢަމަލެކެވެ. ކުރާ ޢަމަލާއި މަސައްކަތުގައި އިޚްލާޞްތެރިކަމެއް ނެތި, ބޭރު ފުށުން އެއީ ރަގަޅު ޢަމަލުތަކެއް ކަމުގައި ފެނުނަސް, އެވާނީ ފާސިދު ޢަމަލުތަކަކަށެވެ. އެއީ ތިމާ ކުރާ އަޅުކަން ކަމުގައި ވިޔަސް މެއެވެ.

ފަރުވާ ކުޑަކޮށް, ދެއްކުންތެރިކަމުގެ ގޮތުން ކުރާ ނަމާދާ ބެހޭގޮތުން މާތް الله ވަހީ ކުރައްވާފައިވާ ބަސްފުޅެއްގެ މާނާއިގައި ވެއެވެ. "ފަހެ އެއުރެންގެ ނަމާދާ މެދު ޣާފިލުވެތިބެ, ނަމާދުކުރާ މީހުންނަށް ގެއްލުމާއި ހަލާކު ހުއްޓެވެ. އެއުރެންނީ, ހަމަ ކަށަވަރުން ކަންދެއްކުމަށް ނަމާދުކުރާ މީހުންނެވެ." މިކަމުން އެނގެނީ އިޚްލާޞްތެރިކަމެއްނެތި ކުރާ ނަމާދަކީ, އޭގައި ރޫޙެއްނެތް އަޅުކަމެއް ކަމެވެ.

އަމިއްލަ އެދުން ބޮޑުވެ, ތަޢުރީފުކުރުމަށް ލޯބިކުރެވުނު ވަރަކަށް އިޚްލާޞްތެރިކަމުގެ ބައްތި ކަނިވަމުން ދާނެއެވެ. ފަޚްރުވެރި ވުމަށާއި, މަޝްހޫރުވުމަށް ލޯބި ކުރެވުނު ވަރަކަށް އިޚްލާޞްތެރިކަން ފަނޑުވަމުން ދާނެއެވެ. الله ޤަބޫލު ކުރައްވަނީ އެއްވެސް ކިލަނބުކަމެއްނެތް, ސާފު ޞާލިހު ޢަމަލުތަކެވެ. އިސްލާމް ދީން ދެކޭގޮތުގައި ކަންދެއްކުމަކީ ޝިރްކުގެ ބާވަތެކެވެ. އަހަރެމެންގެ ރަނގަޅު ޢަމަލުތައް ނުބައި ޢަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުމެވެ.