ދުނިޔޭގެ އެންމެ ތަރައްޤީވެފައިވާ އެއް ޤައުމުކަމުގައިވާ ސިންގަޕޫރުން އެޤައުމުގެ 60 ވަނަ މިނިވަން ދުވަހުގެ ހަދިޔާގެ ގޮތުގައި އެޤައުމުގެ ރައްޔިތުންނަށް ފައިސާގެ ހަދިޔާ ދިނުމަށް ނިންމައިފިއެވެ.

މިގޮތުން ސިންގަޕޫރުގެ ޤާނޫނު ހަދާ މަޖިލީހަށް ސަރުކާރުން ފާސްކުރަން ހުށައެޅި ބަޖެޓުގައި ވަނީ، އެޤައުމުގެ އާބާދީގައި ހިމެނޭ އުމުރުން 21 އަހަރުން މަތީގެ ކޮންމެ މީހަކަށް 600 ޑޮލަރު އަދި އުމުރުން 59 އަހަރުން މަތީގެ ކޮންމެ މީހަކަށް 800 ޑޮލަރު ދިނުމަށް ބަޖެޓުގައި ކަނޑައަޅާފައެވެ. އެ ގައުމުގެ ބޮޑުވަޒީރު ލޯރެންސް ވޯންގ ހާމަކުރެއްވި ގޮތުގައި، ރައްޔިތުންނަށް މިފައިސާގެ ޢިނާޔަތް ދިނުމަށް، 2 ބިލިއަން ސިންގަޕޫރު ޑޮލަރު ޚަރަދުވާނެއެވެ. އަދި މިފައިސާ ރައްޔިތުންނަށް ދޫކުރާނީ މިއަހަރުގެ ޖުލައި މަހުގައެވެ.

ސިންގަޕޫރުގެ މިނިވަން ދުވަހަކީ، ކޮންމެ އަހަރެއްގެވެސް އޯގަސްޓްމަހުގެ 9 ވަނަ ދުވަހެވެ. އިނގިރޭސީންގެ އަތްދަށުން ސިންގަޕޫރު މިނިވަންވީ 9 އޮގަސްޓް 1965 ގައެވެ.