ޤާނޫނު އަސާސީ ބަދަލުކުރެވޭނީ ސީދާ ރައްޔިތުންނަށް ކަމުގައި ހީކުރެވިފައިވާ ކަމުގައި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު އެމަނިކުފާނުގެ ރަސްމީ ސޯޝަލްމީޑިއާ އެކައުންޓްތަކުގައި ކުރެވި ޕޯސްޓުގައި ވިދާޅުވީ، އެމަނިކުފާނަށް ލަފާކުރެވިފައި އޮންނަނީ ޤާނޫނު އަސާސީ އިސްލާޙް ކުރުމުގެ ބާރު އޮތީ މަޖިލީހަށް ކަމަށް ކަމުގައެވެ. ޤާނޫނު އަސާސީގެ ނަޒަރުގައި ޤާނޫނު އަސާސީ ބަދަލު ކުރާނަމަ ފެންނަ ނުފެންނަ ވޯޓެއް ނަގަން ޖެނޭ ކަމަށާއި، އަދި ޤާނޫނު އަސާސީ ބަދަލުކުރުމުގެ ބާރު އޮންނާނީ ސީދާ ރައްޔިތުންނަށް ކަމަށް ދެކެވަޑައިގަންނަވާ ކަމުގައި ރައީސް ނަޝީދު ވަނީ ވިދާޅުވެފައެވެ.

ރަސްމީ އެކައުންޓުން މިގޮތަށް ވިދާޅުވުމަށްފަހުގައި، އެމަނިކުފާނު ގެންގުޅުއްވާ އަނެއް ދިވެހިރާއްޖެ އެކައުންޓުން ކުރެއްވި ޓްވީޓެއްގައި ވިދާޅުވީ، ޤާނޫނު އަސާސީއަށް ބަދަލެއް ގެނެވޭނީ ރައްޔިތުންގެ ފެންނަ ނުފެންނަ ވޯޓަކުން ކަމަށާއި، ޤާނޫނު އަސާސީއަށް އިސްލާޙެއް ގެނެވޭނީ މަޖިލީހުގެ ތިން ބައިކުޅަ ދެބައި ވޯޓުން ކަމަށާއި، މާނަކުރަން ދާންޖެހޭނީ ސުޕްރީމްކޯޓަށް ކަމަށެވެ.

އަދި އުފެދޭ ސުވާލަކީ، މެމްބަރުންގެ ގޮނޑި ގެއްލޭ ހަމަ ބަދަލުކުރުން އެއީ ބަދަލެއްތޯ ނުވަތަ އިސްލާހެއްތޯ ކަމަށާއި، ސްޕްރީމް ކޯޓުގެ ވާޖިބަކީ އެކަން މާނަކޮށްދިނުން ކަމުގައި ކުރީގެ ރައީސް މުޙައްމަދު ނަޝީދު ވަނީ ވިދާޅުވެފައެވެ.

ޕާޓީތަކަށް މެމްބަރުންގެ ގޮނޑި ގެއްލުވާލުމަށް ބާރު ލިބޭ ގޮތަށް، ޤާނޫނު އަސާސީއަށް ގެނައި އިސްލާޙް ބާޠިލްކުރުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު ޢަލީ ޙުސައިން ވަނީ، ދިވެހިރާއްޖޭގެ ސްޕްރީމްކޯޓަށް މައްސަލަ ހުށައަޅުއްވާފައެވެ.

ޢަލީ ޙުސައިން ހުށައެޅުއްވި އެމައްސަލަ ސްޕްރީމްކޯޓަށް ބަަލައިގަނެ އެކޯޓުގައި ކުރިޔަށް ގެންދެވޭނެ ކަމަށް ކަނޑައަޅައި، މައްސަލައިގައި ޖަވާބުދާރީވުމަށް ސްޕްރީމްކޯޓުން ވަނީ ބަންޑާރަނައިބަށް 10 ދުވަހުގެ މުހުލަތެއް ދީފައެވެ.