މޯލްޑިވްސް މީޑިއާ ކައުންސިލުގެ ހުސްވެފައިވާ ދެ މެންބަރުންގެ މަގާމަށް ކުރިމަތިލުމަަށް ހުޅުވާލާފައިވާ ފުރުޞަތު މިއަދު ހަމަވާނެއެވެ.

އެކައުންސިލުގެ މެމްބަރުކަމަށް މެމްބަރުން ހޮވުމަށް ބާއްވާ އިންތިޚާބަށް ކުރިމަތިލުމަށް، އެމްއެމްސީ ހުޅުވާލީ މިމަހުގެ 11 ވަނަ ދުވަހުއެވެ. އެފުރުޞަތުގެ ސުންގަނޑި ހަމަވާނީ މިއަދު 14:00 އަށެވެ.

އެކައުންސިލުންކޮށްފައިވާ އިޢުލާނުގައި ބުނީ، މީޑިއާ ކައުންސިލްގައި އާއްމު މެމްބަރުން ތަމްސީލްކުރާ މެމްބަރެއްގެ މަޤާމާއި މީޑިއާ ކައުންސިލްގައި މީޑިއާތައް ތަމްސީލް ކުރާ މެމްބަރެއްގެ މަޤާމު އަންނަ އޭޕްރީލް މަހުގެ 28 ވަނަ ދުވަހަށް ހުސްވާނެ ކަމަށެވެ. އިންތިޚާބު ބާއްވަނީ އެހެންވެއެވެ.

އާންމު މެންބަރުންގެ ގޮތުގައި ބަލާނީ މީޑިއާއާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަކެވެ. ކައުންސިލުގެ މެންބަރުންގެ މުއްދަތަކީ މީލާދީ 2 (ދޭއް) އަހަރެވެ. އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 (ދޭއް) ދައުރު އަދާ ނުކުރެވޭނެއެވެ.