ކައިވެންޏާއި ވަރި ރަޖިސްޓްރީ ނުކުރުމުގެ ސަބަބުން، ދިވެހި އަންހެނެއްގެ ތިން ފިރިން ތިބި މައްސަލައެއް ފާހަގަވެފައިވާ ކަމުގައި ރާއްޖޭގެ ފެމިލީ ކޯޓުން ބުނެފިއެވެ.

ފެމިލީ ކޯޓުން މިކަންހާމަކޮށްފައި ވަނީ، މިއަދު ބޭއްވި ރައްޔިތުންގެ މަޖިލީހުގެ ޤަވާއިދު ކޮމިޓީގެ ބައްދަލުވުމުގައެވެ.

މިބައްދަލުވުމުގައި ވާހަކަފުޅު ދެއްކެވި ފެމިލީ ކޯޓުގެ އޮފިޝަލަކު ވިދާޅުވީ އެގޮތަށް އެކަން ދިމާވެފައި ވަނީ ކޯޓުން ބޭރުގަޔާއި ރާއްޖެއިން ބޭރުގައި ކައިވެނިކުރުމުގެ ސަބަބުން ނުކުންނަ މައްސަލަ ތަކުގެ ތެރެއިންނެވެ. މިގޮތުން ތިން ފިރިން ތިބިކަމަށް ދައްކާ އެއަންހެންމީހާއަށް އެހާލަތު މެދުވެރިވީ ޤަވާއިދާއި އުޞޫލުތަކުގެ މައްސަލައަކުން ނޫންކަމަށާއި ޤަވާއިދުތަކަށް ބޯ ނުލަނބާތީކަން އޭނާ ފާހަގަކުރެއްވިއެވެ.

ތިންފިރިން ތިބި އަންހެންމީހާ ވަނީ، ކުރީގެ ދެކައިވެނި ރަޖިސްޓްރީކުރުމާއި ވަރިސާބިތު ކުރުމުގެ މަރުޙަލާތައް ނުނިންމައި ކޯޓުން ބޭރުގައި ތިންވަނަ ކައިވެންޏެއްވެސް ކޮށްފައެވެ. މިކަމުގެ ސަބަބުން ނަސަބު އޮޅުމުގެ މައްސަލަތައް ކުރިމަތިވަމުން ހިނގައިދާނެ ކަމުގެ ކަންބޮޑުވުން ފެމިލީ ކޯޓުގެ އޮފިޝަލް ފާހަގަކުރެއްވިއެވެ.

ރާއްޖޭގައި ކައިންޏާއި ވަރީގެ މައްސަލަތައް ގިނަވަމުން އަންނައިރު، ޤާނޫނުތަކާއި ޤަވާއިދުތަކާއި އުޞޫލުތަކަށް ބޯ ނުލެބުމުގެ މައްސަލަތައްވެސް އަންނަނީ ކުރިމަތިވަމުންނެވެ. އަދި ޚާއްޞަކޮށް ހަރުކަށި ދީނީފިކުރުތަކުގެ ސަބަބުން، އަމިއްލައަށް ކައިވެނި ކުރުމާއި، ޤާނޫނުގައި ކަނޑައަޅާފައިވާ އުމުރު ހަމަނުވާ ކުޑަކުދިން ކައިވެނިކުރުވުމުގެ މައްސަލަތައްވެސް މީގެ ކުރިންވެސް ފާހަގަވެފައިވެއެވެ. މިކަންކަމުގެ ސަބަބުން ނަސަބު އޮޅި އިތުރުމައްސަލަތައް ނުކުމެދާނެ ކަމުގެ ކަންބޮޑުވުން ފެމިލީ ކޯޓުން އަންނަނީ ފާޅު ކުރަމުންނެވެ.