ބޮޑެތި މުސާރަވެރިންގެ މުސާރަތައް ކުޑަ ކުރަން ނުފެންކަމުގައި ރައީސުލްޖުމްހޫރިއްޔާއަށް ދެންނެވުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފިއެވެ.

މިކޮމިޓީގެ މުޤައްރިރަކީ ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހީމެވެ.

މިނިވަން މުއައްސަސާތަކާއި ޝަރުއީ ދާއިރާގެ މުވައްޒަފުންގެ މުސާރަ އިން 10 ޕަސެންޓު ކުޑަކުރުމަށް ރައީސް ޑރ މުހައްމަދު މުއިއްޒު ރައްޔިތުންގެ މަޖިލީހުގައި އެދިވަޑައިގެންފައި ނަމަވެސް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މިއަދުގެ ބައްދަލުވުމުގައި މެމްބަރުންގެ އިއްތިފާޤުން ފާސްކުރީ އެއީ މުސާރަތައް ކުޑަކުރެވެން ނެތްކަމުގައި ރައީސުލްޖުމްހޫރިއްޔާއަށް ދެންނެވުމަށެވެ.

ރައީސުލްޖުމްހޫރިއްޔާ ހުށައެޅުއްވީ ސަރުކާރުގެ އިޤުޠިޞާދީ އެޖެންޑާގެ ދަށުން، އަސާސީ މުސާރަ 12000ރ އަށް ވުރެ މަތިން ލިބޭ ފަރާތްތަކުގެ މުސާރައިން %10 އިންސައްތަ އުނިކުރެއްވުމަށެވެ. އަދި އެފިޔަވަޅު އެޅުއްވުމަށް ނިންމަވާފައި ވަނީ 2 އަހަރުވާން ދެންނެވެ. 

މީގެ އިތުރުން ޚުދު ރައީސުލްޖުމްހޫރިއްޔާވެސް އެވަނީ އެމަނިކުފާނުގެ މުސާރަފުޅުގެ %50 ދޫކޮށްލެއްވުމަށް ނިންމަވާފައެވެ.