މި އަހަރުގެ ރަމަޟާން މަހުގެ ރަސްމީ މަސައްކަތު ގަޑިއާއި، ޝައްވާލް މަހުގެ ފުރަތަމަ 7 ދުވަހުގެ ރަސްމީ މަސައްކަތު ގަޑިއަކީ ހެނދުނު 9:00 އިން މެންދުރުފަހު 1:00އަށް ކަމުގައި ރައީސުލްޖުމްހޫރިއްޔާގެ އޮފީހުން ކަނޑައަޅުއްވައިފިއެވެ.

ރައީސުލްޖުމްހޫރިއްޔާގެ އޮފީހުން ވަނީ، މިގޮތަށް ހަމަޖެއްސެވިކަން މިއަދު ޢިއުލާނުކުރައްވާފައެވެ.

ހިޖުރައިން 1443ވަނަ އަހަރުން ފެށިގެން ކޮންމެ އަހަރެއްގެ ރަމަޟާން މަހުގެ ރަސްމީ މަސައްކަތު ގަޑިއާއި، ޝައްވާލް މަހުގެ ފުރަތަމަ 7 ދުވަހުގެ ރަސްމީ މަސައްކަތު ގަޑި، ހެނދުނު 9:00 އިން މެންދުރުފަހު 1:00 އަށް ކަމަށް ކަނޑައަޅުއްވައިފައިވަނީ، ރައީސުލްޖުމްހޫރިއްޔާގެ އޮފީހުން 6 މާރިޗު 2022 ގައި ނެރުއްވި ދެންނެވުމުންނެވެ.

މީގެ އިތުރުން މިދިޔަ އަހަރުންފެށިގެން ރަމަޟާން މަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ވަނީ ހަމަޖައްސަވާފައެވެ. މިގޮތުން މާރިޗު މަހުގެ 21 ވަނަ ދުވަހުން ފެށިގެން އޭޕްރީލް 2 ވަނަ ދުވަހާއި ހަމައަށް ސަރުކާރު ބަންދުވާނެއެވެ. އަދި އޭޕްރީލް 3 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަވައިފިނަމަ، ރޯދަމަހުގެ ފަހުދިހައިގެ ބަންދާއި އީދު ބަންދަށް ފަހު، ސަރުކާރު ހުޅުވޭނީ 6 އޭޕްރީލް 2025ގައެވެ. 

މިއަހަރުގެ ދިރާސީ ކަލަންޑަރަށް ގެނައި ބަދަލާއި އެކު މުޅި ރޯދަމަސް ސްކޫލުތައް ބަންދުވާނެއެވެ.