މިއަހަރު ބާއްވާ ރިޔާސީ އިންތިޚާބުގައި ވާދަކުރާ ކެންޑިޑޭޓުންގެ ކެންޑިޑޭޓް ނަމްބަރު ކަނޑައެޅުމަށް ގުރުއަތު ނަގައި ކެންޑިޑޭޓް ނަމްބަރު ތަރުތީބުކޮށްފިއެވެ.

ކެންޑިޑޭޓް ނަމްބަރު ތަރުތީބުކުރުމަށް ބޭއްވި ރަސްމިއްޔާތު ބާއްވާފައި ވަނީ، ދަރުބާރުގޭގައި ޤާއިމްކޮށްފައިވާ އިންތިޚާބާއި ބެހޭ މަރުކަޒުގައި މިއަދު ހަވީރު 4:30 ގައެވެ.

ކެންޑިޑޭޓުންގެ މެދުގައި ބޭއްވި ގުރު ނެގުމުގައި، އެމްޑީޕީގެ ކެންޑިޑޭޓް ރައީސް ޞާލިޙާއި، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބު ފިޔަވައި، އެހެން ކެންޑިޑޭޓުން ގުރު ނަގާފައިވަނީ އެބޭފުޅުން އަމިއްލައަށެވެ.

މިއަދު ބޭއްވި ރިޔާސީ އިންތިޚާބުގެ ކެންޑިޑޭޓުންގެ ގުރުއަތުލުމުގައި، ކެންޑިޑޭޓުންނަށް ލިބުނު ނަމްބަރުތައް ރަސްމީކޮށް އިޢުލާނުކޮށްދެއްވީ، އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބެވެ.

ރިޔާސީ އިންތިޚާބުގެ ކެންޑީޑޭޓުން ނަމްބަރު ތަރުތީބުވެފައިވާ ގޮތް:

ކެންޑިޑޭޓް ނަމްބަރު 1 - ޢުމަރު ނަސީރު، އަމިއްލަ ގޮތުން

ކެންޑިޑޭޓް ނަމްބަރު 2 - ޙަސަން ޒަމީލް، އަމިއްލަ ގޮތުން

ކެންޑިޑޭޓް ނަމްބަރު 3 - އިބްރާހީމް މުޙައްމަދު ޞާލިޙް، އެމްޑީޕީ

ކެންޑިޑޭޓް ނަމްބަރު 4 - ޑރ މުހައްމަދު މުޢިއްޒު، ޕީއެންސީ

ކެންޑިޑޭޓް ނަމްބަރު 5 - ޤާސިމް އިބްރާހިމް، ޖުމްހޫރީ ޕާޓީ

ކެންޑިޑޭޓް ނަމްބަރު 6 - ފާރިޝް މައުމޫން، އަމިއްލަ ގޮތުން

ކެންޑިޑޭޓް ނަމްބަރު 7 - އިލްޔާސް ލަބީބް، ދަ ޑިމޮކްރެޓްސް

ކެންޑިޑޭޓް ނަމްބަރު 8 - މުޙައްމަދު ނާޒިމް، އެމްއެންޕީ

ރިޔާސީ އިންތިޚާބުގެ ކެންޑިޑޭޓުންގެ ކެންޑިޑޭޓް ނަމްބަރު ތަރުތީބު ކުރުމަށްފަހުގައި އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު ވަނީ، ކެންޑިޑޭޓުން ޢަމަލު ކުރަންވީ ގޮތްތަކާއި، އިންތިޚާބީ ޙައްޤުތަކާއި ގުޅޭ ގޮތުން ވާހަކަފުޅުދައްކަވާފައެވެ.

މިއަހަރުގެ ރިޔާސީ އިންތިޚާބު ބޭޭއްވުމަށް ހަމަޖައްސާފައި ވަނީ، 9 ސެޕްޓެމްބަރު 2023ވާ ހޮނިހިރު ދުވަހުގައެވެ. މި އިންތިޚާބަށް އެންމެ ބޮޑަށް ކެމްޕޭން ކުރައްވަމުން ގެންދަވަނީ، ރައީސް އިބްރާހީމް މުޙައްމަދު ޞާލިޙާއި، ޖުމްހޫރީޕާޓީގެ ކެންޑިޑޓް ޤާސިމް އިބްރާހިމްއާ، އެމްއެންޕީގެ ކެންޑިޑޭޓް މުހައްމަދު ނާޒިމެވެ.

ރިޔާސީ އިންތިޚާބަށް ދެން ބާކީ އޮތީ 30 ދުވަހެވެ.