އިލެކްޝަންސް ކޮމިޝަންގެ ރައީސް ކަމުގެ މަޤާމަށް އެ ކޮމިޝަންގެ މެމްބަރު މުހައްމަދު ޒާހިދު ޢައްޔަނުކުރެއްވުމަށާއި، އަދި އެކޮމިޝަންގެ ނައިބު ރައީސަކަށް އަބްދުއްރަހްމާން ސޮލާހު ރަޝީދު އައްޔަންކުރެއްވުމަށް ރައްޔިތުންގެ މަޖިލީހުން މިއަދު ރުހުން ދެއްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، އެ ދެބޭފުޅުންނަށް ރުހުން ދެއްވާފައި ވަނީ، ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުންނެވެ. އިލެކްޝަންސް ކޮމިޝަންގެ މެމްބަރު ކަމުގެ މަޤާމަށް، މުޙައްމަދު ޒާހިދާއި، އަބްދުއްރަހްމާން ސޮލާހު ރަޝީދު ޢައްޔަނުކުރައްވާފައި ވަނީ، މިދިޔަ ޖެނުއަރީ މަހުގައެވެ.

އީސީގެ ރައީސް ކަމުގެ މަޤާމަށް މިއަދު ޢައްޔަނުކުރެއްވި ޒާހިދަކީ، ކުރިން އެޗްއާރްސީއެމްގެ ނައިބު ރައީސްކަންވެސް ކުރެއްވި ބޭފުޅެކެވެ. އެހެން ނަމަވެސް 22 ޖުލައި 2020 ގައި، އެމްޑީޕީގެ ސުޕަރ މެޖޯރިޓީ އޮތް ރައްޔިތުންގެ މަޖިލީހުގައި ޢިތުބާރު ނެތްކަމުގެ ވޯޓުގައި ނަގައި އޭނާ މަޤާމުން ވަކިކުރިއެވެ. 

އިލެކްޝަންސް ކޮމިޝަންގެ މެމްބަރު ކަމުގެ މަޤާމަށް، ޒާހިދާއި ސޮލާޙް އައްޔަނުކުރެއްވީ ޑިސެމްބަރު މަހުގެ ތެރޭގައި އެކޮމިޝަންގެ މެމްބަރުގައި ތިއްބެވި ބައެއް މެމްބަރުން މަޤާމުން ވަކިކުރެއްވުމަށް ފަހުގައެވެ.