އެންވަޔަރަންމަންޓް މިނިސްޓްރީ އާއި ޓޫރިޒަމް މިނިސްޓްރީ އެއްކޮށްލައި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓްގެ މަގާމަށް ރައީސުލްޖުމްހޫރިއްޔާ ޢައްޔަނުކުރެއްވި ތޯރިގު އިބްރާހީމަށް ރައްޔިތުންގެ މަޖިލީހުން މިއަދު ރުހުންދީފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ނެގި ވޯޓުގައި، މިނިސްޓަރ ޠާރިޤު އިބްރާހީމަށް ރުހުންދޭ މަޖިލީހުން ފާސްކުރެއްވީ ރައްޔިތުންގެ މަޖިލީހުގެ ޖަލްސާގައި ވޯޓުގައި ބައިވެރިވެވަޑައިގެންނެވި، 69 މެމްބަރުންގެ އިއްތިފާޤުންނެވެ.

ހުސްވި ޑިސެމްބަރު މަހުގެ 12 ވަނަ ދުވަހު ހައުސިންގ މިނިސްޓްރީ އާއި އެންޔަރަމަންޓް މިނިސްޓްރީ އަދި ކޮންސްޓްރަކްޝަން މިނިސްޓްރީ އަނދައިގެން ދިޔުމަށްފަހު، އަދި ޓޫރިޒަމް މިނިސްޓަރުގެ މަޤާމުގައި ހުންނެވި އިބްރާހީމް ފައިސަލް މަޤާމުން ވަކި ކުރެއްވުމަށްފަހުގައި، މިނިސްޓްރީ އޮފް އެންވަޔަރަމަންޓާއި ޓޫރިޒަމް މިނިސްޓްރީ އެއްކޮށްލައްވައި ވަޒީރަކަށް ޠާރިޤު އިބްރާހީމް ހަމަޖެއްސެވީ، މިމަހުގެ އެއްވަނަ ދުވަހުގައެވެ.

މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓްގެ މަޤާމަށް ޠާރިޤު އިބްރާހީމް ޢައްޔަނުކުރެއްވުމަށްފަހު އެދުވަހު ރައީސުލްޖުމްހޫރިއްޔާ ވަނީ ޠާރިޤާއި ބައްދަލުކުރައްވާފައެވެ. އެގޮތުން ތިމާވެއްޓާއި ފަތުރުވެރިކަން ގުޅުވައިގެން ރާއްޖެ އިޝްތިހާރުކުރެއްވުމުގެ މުހިންމުކަން ރައީސުލްޖުމްހޫރިއްޔާ އެދުވަހު ފާހަގަކުރެއްވިއެވެ.