އިތުބާރުކުރެވޭ މަގާމެއްގައި ތިބި ފިރިހެނަކު އުމުރުން 18 އަހަރުން ދަށުގެ އަންހެން ކުއްޖަކަށް ގިނަ ދުވަސްތަކެއް ވަންދެން ޖިންސީ ގޯނާކުރި މައްސަލައެއް ފެންމަތިވެއްޖެއެވެ.

ފުލުހުންގެ އިދާރާއިން ވިދާޅުވީ އެހާދިސާ ހިނގާފައި ވަނީ، މެދު އުތުރު ޕްރޮވިންސްގައި ހިމެނޭ (ނ. ރ. ބ. ޅ.) އަތޮޅެއްގެ ރަށެއްގައި ކަމަށެވެ. އެމައްސަލަ ފުލުހުންނަށް ރިޕޯޓްކޮށްފައި ވަނީ 2025 ޖެނުއަރީ 20 ވަނަ ދުވަހުގައި ކަމަށް ފުލުހުންގެ އިދާރާއިން ވިދާޅުވިއެވެ.

އެމައްސަލަ ރިޕޯޓްކޮށްފައި ވަނީ 2024 ވަނަ އަހަރާއި އޭގެ 2 އަހަރު ކުރިންވެސް އެކުއްޖާއަށް ޖިންސީ ގޯނާ ކޮށްފައިވާ ކަމަށް ބުނެ ކަމަށާއި،  ނަމަވެސް މިމައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ. ނަމަވެސް މައްސަލަތަޙްޤިޤު ކުރަމުންދާ ކަމުގައި ފުލުހުންގެ އިދާރާއިން ވިދާޅުވިއެވެ.

ރާއްޖޭގައި ކުޑަކުދިންނަށް ޖިންސީ ގޯނާ ކުރުމުގެ މައްސަލަތަކަކީ ބޮޑު މައްސަލައެެކެވެ. އެހެންވެ ޤާނޫނުތައް އިތުރަށް ހަރުކަށިކޮށްފައި ވެއެވެ. ޚާއްޞަކޮށް ޢިތުބާރުކުރެވޭ މަޤާމެއްގައި ހުރި މީހަކު ކުއްޖަކަށް ޖިންސީ ގޯނާކޮށްފި ނަމަ އެއީ ބޮޑު އަދަބެއް ލިބޭނެ ކުށެކެވެ.