ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީ.އެސް.އެމް) ގުޅިގެން މިދިޔަ އަހަރުފެށި، "އަހާ" ފޯރަމް 10 މަސް ދުވަހުގެ މެދު ކެނޑުމަކަށް ފަހުގައި ރޭ އަނެއްކާވެސް ބާއްވައިފިއެވެ.

ރޭ ބާއްވާފައި ވަނީ މި ސިލްސިލާގެ 4 ވަނަ ފޯރަމެވެ. އެންމެ ފަހުން ވަޒީރުންނާއި އެކު އަހާ ފޯރަމް ބާއްވާފައި ވަނީ މިދިޔަ އަހަރުގެ އޭޕްރީލް މަހުގައެވެ.

ސަރުކާރުގެ މަސައްކަތްތަކާއި ބެހޭގޮތުން ރައްޔިތުންނަށް މައުލޫމާތު ހިއްސާކުރެއްވުމަށް ބާއްވަވާ 'އަހާ' ފޯރަމްގައި ރައީސުލްޖުމްހޫރިއްޔާވެސް އެއް ފަހަރު ބައިވެރިވެވަޑައިގެންނެވިއެވެ. އެމަނިކުފާނު އެ ފޯރަމްގައި ބައިވެރިވެވަޑައިގެންނެވީ އެންމެ ފަހަރަކުއެވެ. އެއީ މީގެ އެއް އަހަރު ކުރިންނެވެ.

ރޭގެ ފޯރަމްގައި ބައިވެރިވެވަޑައިގެންނެވީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދު، މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދު، މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤު އިބްރާހީމް، މިނިސްޓަރ އޮފް ސޯޝަލް އެންޑްފެމިލީ ޑިވެލޮޕްމަންޓް ޑޮކްޓަރޢާއިޝަތު ޝިހާމް، އަދި މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދެެވެ.

މިކަމަކީ ސަރުކާރުން ރައްޔިތުންނާ ވީހާވެސް ގާތުން މަސައްކަތް ކުރުމަށާއި، ވީހާވެސް ހާމަކަން ބޮޑުގޮތެއްގައި ސަރުކާރުގެ މަސައްކަތްތައް ކުރިއަށް ގެންދިއުމަށް ބާރު އެޅުމުގެ ގޮތުން ކުރިޔަށް ގެންދާ މަސައްކަތެއް ކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.