ދެ އަހަރުގެ ކާފަ ދަރިފުޅާއި ބެހިގެން އުމުރަށް ޖަލަށް ލާފައި ހުރި މީހާ ރޭ މަރުވެއްޖެއެވެ.

ހުޅުމާލޭ ޖަލުގައި ރޭ މަރުވެފައި ވަނީ، ގއ. ކަނޑުހުޅުދޫ، ރިހިވެލި، އިބްރާހިމް ދީދީ (67 އަހަރު)އެވެ. އޭނާއަކީ އޭނާގެ އުފަން ކާފަ ދަރިފުޅަކަށް ޖިންސީ ގޯނާކޮށްގެން 25 އަހަރަށް ޖަލަށް ލާފައި ހުރި މީހެކެވެ. 

މޯލްޑިވްސް ކަރެކްޝަނަލް ސަރވިސް އިން ވިދާޅުވީ،  އިބްރާހިމް ދީދީ ރޭ ހޭލާ އުޅެނިކޮށް ކުއްލިއަކަށް ވެއްޓުމާއި ގުޅިގެން މެޑިކަލް ޓީމްއިން ބަލައި، އަވަސް ފަރުވާ ދިނުމުންވެސް ހަރަކާތެް ނުކުރާތީ، އޭނާ ވަނީ އެމަޖެންސީގައި ހުޅުމާލޭ ހޮސްޕިޓަލަށް ގެންގޮސް ފަރުވާ ދޭން ފަށާފައި ކަމަށެެވެ. އަދި އޭނާ މަރުވެފައިވާ ކަމަށް ހޮސްޕިޓަލުން ކަނޑައަޅާފައި ވަނީ ރޭގެ 2:40 ގައި ކަމަށްވެސް މޯލްޑިވްސް ކަރެކްޝަނަލް ސަރވިސް އިން ވިދާޅުވިއެވެ. 

ރޭ މަރުވި މީހާއާއެކު އެމީހާގެ ބައްޕަވެސް ހަމަ އެމައްސަލައިގައި ޖަލަށްލިއެވެ. އޭނާވެސް މަރުވީ ޖަލު ބަންދުގައެވެ.

ގއ. ކަނޑުހުޅުދޫގައި އުމުރުން 2 އަހަރުގެ ކުޑަކުއްޖަކަށް، ކާފަ އާއި މުނިކާފަ ޖިންސީ ގޯނާކުރަމުން ދިޔަކަން ފަޅާ އެރީ 2020 ވަނަ އަހަރުގައެވެ. އެމައްސަލައިގައި ކުއްޖާގެ ބައްޕައަށްވެސް ތުހުމަތުތައް ކޮށްފައިވެއެވެ.