Advertisement
ރައްޔިތުންގެ މަޖިލީހުގެ ޖަލްސާއެއްގެ ތެރެއިން ---
ދައުރު ކުރުކޮށްލައި ރޯދަމަހު މަޖިލީހުގެ މެމްބަރުން ޗުއްޓީއަށް ދިޔުމަށް ފާސްކޮށްފި
ރައްޔިތުންގެ މަޖިލީހުގެ ޤަވާއިދަށް ބަދަލު ގެނެސް ދައުރު ކުރުކޮށްފައި މިފެށޭ ރޯދަ މަހު މަޖިލިސް ޗުއްޓީއަށް ދިޔުމަށް ރައްޔިތުންގެ މަޖިލީހުގެ އާއްމު ކޮމިޓީން ފާސްކޮށްފިއެވެ.
ރައްޔިތުންގެ މަޖިލީހުގެ އާއްމު ކޮމިޓީން މިގޮތަށް ފާސްކޮށްފައި ވަނީ، މާފަންނު ދެކުނު ދާއިރާގެ ސަރުކާރު މެމްބަރު މެންބަރު އަބްދުﷲ ރިފާއު މަޖިލީހުގެ ޤަވާއިދަށް ހުށައެޅުއްވި އިސްލާޙްތައް ދިރާސާކުރެއްވުމަށް ފަހުގައެވެ.
ރިފާޢު ހުށައެޅުއްވި އިސްލާޙްގައި މަޖިލީހުގެ ފުރަތަމަ ދައުރަކީ ޖެނުއަރީމަސް ކަމުގައި ކަނޑައެޅުމާއި އެކު، ދެވަނަ ދައުރާއި ތިންވަނަ ދައުރު ދިގުކޮށްލުމަށް ހުށައަޅާފައިވެއެވެ. މިގޮތުން، ދެވަނަ ދައުރު އޭޕްރިލްމަހުގެ ފުރަތަމަ ދުވަހުން ފެށިގެން ޖުލައި މަހުގެ ނިޔަލަށް އަދި ތިންވަނަ ދައުރު ސެޕްޓެމްބަރު މަހުގެ ފުރަތަމަ ދުވަހުން ފެށިގެން ނޮވެމްބަރުމަހުގެެ ނިޔަލަށް އޮންނަ ގޮތަށް ބަދަލު ކުރުމަށް ހުށައަޅާފައިވެއެވެ.
ކޮމިޓީން ފާސްކުރި ގޮތަށް އެއްވެސް ބަދަލެއް ނުގެނެސް ރައްޔިތުންގެ މަޖިލީހުން ފާސްކޮށްފި ނަމަ ރިޔާސީ ބަޔާން އިއްވުންވެސް ދެން އޮންނާނީ ޖެނުއަރީ މަހުގައެވެ.
މިހާރު ރައްޔިތުންގެ މަޖިލީހުގެ ޤަވާއިދު އޮތް ގޮތުން މަޖިލީހުގެ ފުރަތަމަ ދައުރު ފަށާނީ، ފެބުރުއަރީ މަހުގެ ފުރަތަމަ ހޯމަ ދުވަސް ނުވަތަ ބުރާސްފަތި ދުވަހުގައެވެ.
