އިއްޔެ ކުއްލި ގޮތަކަށް ނިޔާވި، ރާއްޖޭގެ ކުޅަދާނަ މިޔުޒީޝަން އަދި މަޝްހޫރު ލަވަކިޔުންތެރިޔާ މެޒޯ މުޙައްމަދު މާޖިދުގެ ޖަނާޒާ އާސަހަރާގައި ބާއްވައިފިއެވެ.

މެޒޯ މޯޑުގެ މޫނު ދެއްކުން ކުރިޔަށް ގެންދިޔައީ ޢަސްރު ނަމާދުގެ ކުރީގައި އިސްލާމީ މަރުކަޒުގައެވެ. އޭނާގެ ހަށިގަނޑު ވަޅުލާފައި ވަނީ އާސަހަރާގައެވެ.

މެޒޯ މޯޑްގެ ޖަނާޒާގައި ކުރީގެ ރައީސުންނާއި ވަޒީރުންނާއި އާއިލާގެ ބޭބޭފުޅުންގެ އިތުރުން އާއްމުންގެ ގިނަ އަދަދެއްގެ ބަޔަކު ބައިވެރިއެވެ. ވަރަށް ކުއްލި ގޮތަކަށް އޭނާ ނިޔާވީ އިއްޔެ ހަވީރު ހާޓް އެޓޭކެއް ޖެހިގެންނެވެ. މެޒޯ މޯޑް ނިޔާވުމުގެ ހިތާމައިގައި މިހާރުގެ ރައީސާއި ކުރީގެ ރައީސުންވެސް ވަނީ އެއާއިލާއަށް ތަޢުޒިޔާ ފޮނުއްވާފައެވެ.

މެޒޯ މުހައްމަދަކީ، މޮޅު ގިޓަރިސްޓެކެވެ. އަދި އަމިއްލައަށް ލިރިކްސް ލިޔެ ލަވަތައް ކިޔާފައިވެއެވެ. މެޒޯ މުހައްމަދުގެ ލަވަތަކުގެ ތެރެއިން އެންމެ މަޝްހޫރުވި ލަވަ"ވިސްނާ، ވިސްނާ، ބޮލުގައި ރިއްސާ" މިލަވައަކީ، ބޭރުގެ ޗެނަލަކުން ފުރަތަމަ ބްރޯޑްކާސްޓް ކުރި ދިވެހި ލަވައެވެ. މީގެ އިތުރުން، "އުޑުން ތަރިތައް އޮތީމޭ ހިތުން ގުނަ ގުނާ"، "ކަމަނަ ގޯތީ އާދަނުތާއޭ، އާގޮތަކަށް އޮޑިބޭލީ" "މާކަނޑުގެ މެދުތެރޭ ވާހަމަ ހިމޭން ކަމޭ" ފަދަ ލަވަތަކަކީ ފާހަގަކޮށްލެވޭ ލަވަތަކެވެ. 

މިޔުޒިކީ ފަންނުގައި ރާއްޖެއިން ބޭރުގައި ރާއްޖެ ތަމްސީލް ކުރުމުގައިވެސް މެޒޯ މޯޑްގެ ބައިވެރިވުން ބޮޑެވެ. މިގޮތުން ރާއްޖޭގެ ފަތުރުވެރިކަން ޕްރޮމޯޓް ކުރުމަށް ބޭރުގެ އެކިއެކި ފެއާތަކުގައި ބައިވެރިވެ މިޔުޒިކާއި ލަވަ ހުށަައަޅުއްވާފައިވެއެވެ. އެފަންނުގައި އޭނާ އެންމެ ބޮޑަށް ފާހަގަކުރެވިފައި ވަނީ އަމިއްލަ ދިވެހި ރާގުތައް އުފެއްދުމަށް މަސައްކަތް ކުރެއްވި ފަންނާނެއްގެ ގޮތުގައެވެ.