ރާއްޖޭހގެ މަޝްހޫރު މިޔުޒިކީ ފަންނާނު އަދި ލަވަކިޔުންތެރިޔާ މެޒޯ މުޙައްމަދު ނިޔާވުމާއި ގުޅިގެން ރައީސުލްޖުމްހޫރިއްުޔާ ޑރ. މުޙައްމަދު މުޢިިއްޒު އެއާއިލާއަށް ތަޢުޒިޔާ ވިދާޅުވެއްޖެއެވެ.

މެޒޯ މޯޑުގެ އާއިލާއަށް ތަޢުޒިޔާ ވިދާޅުވެ ރައީސުލްޖުމްހޫރިއްޔާ ފޮނުއްވި މެސެޖުގައި ވިދާޅުވީ، ފަންނާއި މުނިފޫހިފިލުވުމުގެ ދާއިރާއަށް 45 އަހަރަށް ވުރެ ދިގު މުއްދަތަކަށް ޚިދުމަތް ކުރައްވައި، އަދި ދިވެހި އަމިއްލަ ފަންނީ ބައެއް އުފެއްދުން އުފެއްދުމުގައި ވެސް މަޤްބޫލު ހުނަރުވެރިކަަމެއް ދައްކަވާފައިވާ، މުޙައްމަދު މާޖިދު (މެޒޯ މުޙައްމަދު) ނިޔާވުމުގެ ހިތާމައިގައި، އެ މަރުޙޫމްގެ ޢާއިލާއަށް ތަޢުޒިޔާ ފޮނުއްވާކަމަށެވެ. 

މެޒޯ މުޙައްމަދު ނިޔާވުމުގެ ހިތާމައިގައި ކުރީގެ ރައީސް ނަޝީދުވެސް ވަނީ އެއާއިލާއަށް ތަޢުޒިޔާ ފޮނުއްވާފައެވެ. 

ރައީސް ނަޝީދު އެކްސްގައި ކުރެއްވި ޕޯސްޓްގައި ވިދާޅުވީ، މެޒޯ މުޙައްމަދަކީ އެމަނިކުފާނުގެ އެންމެ ގާތް ރަޙުމަތްތެރިންގެ ތެރޭގައި ހިމެނޭ މީހެއް ކަމަށެވެ. އަދި މެޒޯ މުހައްމަދަކީ އެމަނިކުފާނުގެ އާއްމު މަސައްކަތްތަކުގައި މުހިއްމު ބައިވެރިއެއް ކަމަށާއި ރާއްޖެ ޑިމޮކްރަސީއަށް ކުރި ދަތުރުގައި މުހިއްމު ޙިއްޞާ ދާރެއް ކަމުގައިވެސް ރައީސް ނަޝީދު ވިދާޅުވިއެވެ.

އުމުރުން 60 އަހަރުގައި މިއަދު މެޒޯ މުޙައްމަދު ކުއްލިގޮތަކަށް ނިޔާވީ ސަރުކާރުގެ މައި ހޮސްޕިޓަލް އައިޖީއެމްއެޗްގައެވެ.