ކުޅަދާނަ މިޔުޒީޝަން އަދި މަޝްހޫރު ލަވަކިޔުންތެރިޔާ މެޒޯ މުހައްމަދު ނިޔާވެއްޖެއެވެ.

ދިމާވި ކުއްލި ސިއްޙީ މައްސަލައަކާއި ގުޅިގެން އައިޖީއެމް ހޮސްޕިޓަލުގައި ފަރުވާދެުން ދަނިކޮށް އޭނާ ނިޔާވީ މިއަދުގެ ހަވީރުގައެވެ. ނިޔާވި އިރު އުމުރަކީ 60 އަހަރެވެ.

މެޒޯ މުހައްމަދަކީ، މޮޅު ގިޓަރިސްޓެކެވެ. އަދި އަމިއްލައަށް ލިރިކްސް ލިޔެ ލަވަތައް ކިޔާފައިވެއެވެ. މެޒޯ މުހައްމަދުގެ ލަވަތަކުގެ ތެރެއިން އެންމެ މަޝްހޫރުވި ލަވަ"ވިސްނާ، ވިސްނާ، ބޮލުގައި ރިއްސާ" މިލަވައަކީ، ބޭރުގެ ޗެނަލަކުން ފުރަތަމަ ބްރޯޑްކާސްޓް ކުރި ދިވެހި ލަވައެވެ. މީގެ އިތުރުން، "އުޑުން ތަރިތައް އޮތީމޭ ހިތުން ގުނަ ގުނާ"، "ކަމަނަ ގޯތީ އާދަނުތާއޭ، އާގޮތަކަށް އޮޑިބޭލީ" "މާކަނޑުގެ މެދުތެރޭ ވާހަމަ ހިމޭން ކަމޭ" ފަދަ ލަވަތަކަކީ ފާހަގަކޮށްލެވޭ ލަވަތަކެވެ. 

މިޔުޒިކީ ފަންނުގައި ރާއްޖެއިން ބޭރުގައި ރާއްޖެ ތަމްސީލް ކުރުމުގައިވެސް މެޒޯ މޯޑްގެ ބައިވެރިވުން ބޮޑެވެ. މިގޮތުން ރާއްޖޭގެ ފަތުރުވެރިކަން ޕްރޮމޯޓް ކުރުމަށް ބޭރުގެ އެކިއެކި ފެއާތަކުގައި ބައިވެރިވެ މިޔުޒިކާއި ލަވަ ހުށަައަޅުއްވާފައިވެއެވެ. އެފަންނުގައި އޭނާ އެންމެ ބޮޑަށް ފާހަގަކުރެވިފައި ވަނީ އަމިއްލަ ދިވެހި ރާގުތައް އުފެއްދުމަށް މަސައްކަތް ކުރެއްވި ފަންނާނެއްގެ ގޮތުގައެވެ. 

ރައީސް ނަޝީދުގެ ވެރިކަމުގައި ލަވަޔާއި މިޔުޒިކުގެ ދާއިރާއިން އާއްމު ޚިދުމަތުގެ ހިއްވަރު ދިނުމުގެ އިނާމްވެސް މުހައްމަދަށް ވަނީ ދެއްވާފައެވެ. 

މިޔުޒިކީ ފަންނުގެ އިތުރުން ރާއްޖެ ޑިމޮކްރަސީއަށް ކުރި ދަތުރުގައި އެމްޑީޕީގެ އެކްޓިވިސްޓެއްގެ ގޮތުގައި އެޕާޓީއާއެކު ސީދާ ހަރަކާތްތަކުގައި ކުރީ ސަފުގައި މުހައްމަދު ބައިވެރިވެފައިވެއެވެ.