ރޯދަ މަހު އުމްރާއަށް ދާ މީހުންނަށް ބޭންކް އޮފް މޯލްޑިވްސް (ބީއެމްއެލް) ޑެބިޓް ކާޑަށް، މިހާރު އޮންނަ ޑޮލަރު ލިމިޓްގެ އިތުރަށް 1،500 ޑޮލަރު ދޭން ނިންމާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓްގައި ވިދާޅުވީ، 1446 ވަނަ އަހަރު (މިއަހަރު)ގެ ރަމަޟާންމަހު ޢުމްރާއަށްދާ މީހުންނަށް ބޭންކްގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ޙައްލެއް ހަމަޖައްސައިދިނުމުގެގޮތުން، ކޮންމެ ޢުމްރާވެރިއެއްގެ ބޭންކް އޮފް މޯލްޑިވްސް ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1500 ޑޮލަރުގެ ލިމިޓެއް ހަމަޖައްސަވައި ދެއްވުމަށް ބޭންކް އޮފް މޯލްޑިވްސް އަށް އަދި MMA އަށް ދަންނަވަވާފައިވާ ކަމަށެެވެ.

މިހާރު ބީއެމްއެލްއިން ޑެބިޓް ކާޑުތަކަށް ހަމަޖައްސާފައި ވަނީ، 250 ޑޮލަރުގެ ލިމިޓެކެވެ. ރައީސްގެ މިނިންމެވުމާއިއެކު ޑެބިޓް ކާޑުތަކުން 1750 ޑޮލަރުގެ މުއާމަލާތް ކުރެވޭނެއެވެ.

މިހާތަނަށް ރާއްޖެއިން އުމުރާއަށް ދާ މީހުންނަށްވެސް ލިބެނީ، ރާއްޖެއިން ބޭރަށް ފުރާ ފަރާތްތަކަށް 500 ޑޮލަރު ދޫކުރާ އުސޫލުން އެ ޑޮލަރު އެކަންޏެވެ. އެހެން ނަމަވެސް އަލަަށް މިހަމަޖެހުނު އުސޫލުގެ ސަބަބުން ޑެބިޓް ކާޑު ގެންގުޅޭ ފަރާތްތަކަށް ބޭންކު ރޭޓުގައި އިތުރު ޑޮލަރުގެ މުއާމަލާތްތައް ކުރުމަށް ޑޮލަރު ލިބޭނެއެވެ.