މިއަދު ހެނދުނު މ. ޕްލާޒާ ގައި ހިނގި އަލިފާނުގެ ހާދިސާ އާއި ގުޅިގެން 2 ގެއަކުން 55 މީހަކަށް ވަގުތީ ބޯހިޔާވަހިކަން ހަމަޖައްސައި ދީފައިވާ ކަމަށް ވަގުތީ ބޯހިޔާވަހިކަން ހަމަޖައްސައިދީފައިވާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވިދާޅުވެއްޖެއެވެ.

އެ އޮތޯރިޓީން ވިދާޅުވެފައިވާ ގޮތުގައި، ވަގުތީ ބޯހިޔާވަހިކަން ފޯރުކޮށްދީފައި ވަނީ، މ. ޕްލާޒާގައި މިއަދު ހިނގި އަލިފާނުގެ ހާދިސާގެ ސަބަބުން، ދެ ގެއެއްގެ މައި ފެންހޮޅިއަށްއަށް ގެއްލުން ލިބިފައިވާތީ އެ ދެގޭގައި ދިރިއުޅެމުން އައި މީހުންނަށެވެ. އޭގެ ތެރޭގައި ހިމެނެނީ، 20 ބިދޭސީންނާއި 32 ދިވެހީންނެވެ. އެމީހުންނަށް ވަގުތީ ބޯހިޔާވަހިކަން ފޯރުކޮށްދިނުމަށް ނިންމާފައި ވަނީ، އެ ދެގޭގެ ފެންހޮޅިތައް މަރާމާތު ކުރެވެންދެން ކަމުގައިވެސް އެ އޮތޯރިޓީން ވަނީ ވިދާޅުވެފައެވެ.

ގިނަ ދުވަސްތަކެއް ވާންދެން ފަޅަށް ހުރި، މ. ޕްލާޒާ ހައުސްގައި އަލިފާނުގެ ހާދިސާ ހިނގާފައި ވަނީ މިއަދު ހެނދުނުއެވެ. އެމްއެންޑީއެފްއިން ވިދާޅުވީ، އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް އެ ހާދިސާގެ މަޢުލޫމާތު ލިބުނީ މިއަދު ހެނދުނު 06:35 ހާއިރުގައި ކަމަށެވެ. އަދި އެގޭގައި ރޯވެފައިވާ އަލިފާން 7:47 ހާއިރުގައި ނިވާލެވިފައިވާ ކަމުގައި އެމްއެންޑީއެފުން ވިދާޅުވިއެވެ.

ގިނަދުވަސް ތަކެއްވަންދެން ފަޅުގެއެއްގެ ގޮތުގައި ހުންނަ މި ގޭގައި އަލިފާން ރޯވެފައިވަނީ އެ ގޭގައި ހުރި ކުނިތަކެއްގައި ކަމުގައިވެސް އެމްއެންޑީއެފުން ވިދާޅުވެފައި ވެއެވެ.