ގއ ވިލިގިލީގައި ހުންނަ ގއ އަތޮޅު ހޮސްޕިޓަލުގައި ސިޒޭރިއަން ހެދުމަށްފަހު މާލެއަށް އިތުރު ފަރުވާއަށް ނުގެނެވި ނިޔާވި ޝިއުނާ ތައުފީޤު ނިޔާވުމުގައި ކަމާއި ބެހޭ ފަރާތްތަކުގެ އިހުމާލު އެބައޮތް ކަމުގައި އާއިލާއިން ބުނެފިއެވެ.

ޗެނަލް 13 އަށް ދިން ބަސްދީގަތުމުގައި، ނިޔާވި، ޝިއުނާ ތައުފީޤުގެ ފިރިމީހާ، ޝިފާޒު ޒާހިރު ބުނީ އޭނާގެ އަނބިމީހާ އާއި އަނބިމީހާ ވިހޭ ދަރިފުޅު ނިޔާވެގެން ދިޔުމުގައި ހޮސްޕިޓަލާއި ކަމާއި ބެހޭ ފަރާތްތަކުގެ އިހުމާލުވުން އޮތް ކަމަށް ޤަބޫލުކުރާ ކަމަށެވެ. މިގޮތުން ރޯގާޖެހި ނޭވާއަށް އުނދަގޫވާތީ، ގއ އަތޮޅު ހޮސްޕިޓަލަށް ފަރުވާ ހޯދަން ދިޔުމުން އެކަށީގެންވާ ފަރުވާ ނުލިބުމާއި، އިތުރު ފަރުވާއަށް ނުފޮނުވި 24  ގަޑިއިރަށް ވުރެ ގިނަ އިރުވުން އޭނާ ފާހަގަކުރިއެވެ.

ޝިފާޒު ބުނީ އޭނާގެ އަނބިމީހާ ސިޒޭރިއަން ހަދައިގެން ވިއްސީ ފިފްޓީ ފިފްޓީ ޗާންސެއް އޮތުމުން ކަމަށް ޑޮކްޓަރުން ބުނުމުން ކަމަށާއި، މައިމީހާ ސަލާމަތްކޮށްދޭން އެދުނު ކަމަށެވެ. އިތުރު ފަރުވާއަށް މާލެ ފޮނުވުމަށް ފުރަތަމަ ހަމަޖެއްސި ފްލައިޓް ކެންސަލްކުރީ ދަރިފުޅު މަރުވުމުން ކަމަށް ބުނި އެކަން އޭނާއަށް ނާންގާ ކަމުގައިވެސް ޝިފާޒް ވަނީ ބުނެފައެވެ.

ޝިފާޒް ބުނީ އޭނާގެ އަނބިމީހާ އިތުރު ފަރުވާއަށް މާލެ ފޮނުވުމަށް އެއާ އެމްބިއުލާންސް ހަމަޖެއްސި އިރު އޭގައި އެކަށީގެންވާ ވަސީލަތްތަކެއް ނެތްކަމަށާއި، އެއާ އެމްބިއުލާންސްގެ ވެންޓިލޭޓަރުވެސް ހުރީ ހަލާކުވެފައި ކަމަށެވެ.

ޝިފާޒްގެ އަންހެނުން އެއާ އެމްބިއުލާންގައި މާލެ ގެންދަން ޖެހުނީ ފުއްޕާމޭގައި އޮކްސިޖަން ނުހިފަހައްޓާތީ އޮކްސިޖަން ގުޅައިގެން ކަމަށާއި، އެއާ އެމްބިއުލާންސްގައި ބޭނުންވާ ވަަރަށް އޮކްސިޖަން ލިބެން ނެތް އިރު، ގއ އަތޮޅު ހޮސްޕިޓަލުން ފޮނުވި އޮކްސިޖަންފުޅި ބޯޓަށް އަރުވަން މޯލްޑިވިއަންއިން ދެކޮޅު ހެދީ ކަމަށާއި، ހުއްދަ ލިބުނު އިރު އަނބިމީހާ ނިޔާވެއްޖެ ކަމުގައި ޝިފާޒް ބުންޏެވެ. ޝިފާޒް ބުނީ އޭނާގެ އަނބިމީހާ އިތުރު ފަރުވާއެއް ނުލިބި ކޫއްޑޫ އެއާޕޯޓުގައި 3 ގަޑިއިރު އޮތް އިރު، ފްލައިޓް ކައިރީ ރަންވޭ މަތީގައިވެސް ދޮޅު ގަޑި އިރު ބާއްވަން ޖެހުނު ކަމަށެވެ.

ދެމައިން މަރުވި މި މައްސަލަ ކަމާއި ބެހޭ ފަރާތްތަކުން ވަނީ ތަޙްޤީޤު ކުރަން ފަށާފައެވެ.