ރާއްޖޭގައި އިންޑިއާ ސިފައިން ޤާއިމްވެ ތިބޭ މައްސަލައިގައި ނޫސްވެރިއަކު ދެންނެވި ސުވާލުގެ ޖަވާބުގައި ދިވެހި ސަރުކާރާއި ރައްޔިތުން މިތިބީ އަތްގައިދަށުވެފައި ކަމުގައި، ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.

މިއަދު ރައްޔިތުންގެ މަޖިލީހުގައި ޤާސިމް އިބްރާހިމް ބޭއްވި ނޫސްވެރިންގެ ބައްދަލުވުމުގައި، އިންޑިއާ ސިފައިން ރާއްޖޭގައި ޤާއިމްވެ ތިބޭ ތިބުމާއި ގުޅޭގޮތުން، އޮންލައިން ނޫސް އަދަދުގެ ނޫސްވެރިޔާ ކުރި ސުވާލަށް ސާފު ޖަވާބެއް ނުދެއްވައި ޤާސިމް ވިދާޅުވީ، މިތިބީ އަތްގައިދަށުވެފައި ކަމަށެވެ. އަދި އިންޑިއާ އާއި ދެކޮޅުވެގެން ލިބެން އޮތީ ގެއްލުން ކަމުގައިވެސް ޤާސިމް ވިދާޅުވިއެވެ.

ޤާސިމް ވިދާޅުވީ، ރާއްޖެއިން އިންޑިއާ ސިފައިން ތިބުން ބަދަލުނުކުރެވިގެން އުޅެނީ ކޮން ސަބަބަކާއި ހެދިކަން ވިސްނާލަން ޖެހޭ ކަމަށެވެ. 

ޤާސިމް އިބްރާހީމް ވިދާޅުވީ، އިންޑިއާ ސިފައިން ރާއްޖެއަށް ގެނައުމަކީވެސް ކުރީގެ ސަރުކާރަކުން ކޮށްފައި އޮތް ކަމެއް ކަމަށެވެ. މިގޮތުން އެކަން ކުރެއްވީ އެމްޑީޕީގެ ސަރުކާރުގައި ރައީސް ނަޝީދު ކަމުގައި ޤާސިމް އިބްރާހިމް ވިދާޅުވިއެވެ.

ރާއްޖޭގައި ތިބި އިންޑިއާ ސިފައިން ފޮނުވާލުމަކީ، ރިޔާސީ އިންތިޚާބުގެ ތެރޭގައި ޤާސިމް އިބްރާހިމްވެސް އަދި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވެވަޑައިގެންނެވި ވަޢުދެކެވެ. ރާއްޖޭގައި ތިބި އިންޑިއާ ސިފައިން ފޮނުވާލެވިއްޖެކަމަށް ރައީސް ޑރ. މުޙައްމަދު މުޢިއްޒުގެ ސަރުކާރުން އިޢުލާނު  ކުރެއްވި ނަމަވެސް އެކަން ނުކުރެވޭ ކަމުގެ މޭރުމަކުން މިއަދުގެ ނޫސްކޮށްފަރެންސްގައި ޤާސިމް އިބްރާހީމްވެސް ވަނީ ވާހަކަފުޅު ދައްކަވާފައެވެ.