ގެދޮރުވެރިޔާ ސްކީމްގެ ދަށުން ކުރީ ސަރުކާރުގައި ދޫކުރުމަށް ނިންމި 4000 ފްލެޓް ލިބޭ ފަރާތްތަކުގެ ލިސްޓް މިމަހު ހާމަކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، މިއަދު ރައްޔިތުންގެ މަޖިލީހުގައި ރިޔާސީ ބަޔާން އިއްވަވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ މީގެ ކުރިންވެސް ވަނީ، ރޯދައިގެ ކުރިން ފްލެޓް ލިސްޓް އާއްމުކުރައްވާނެ ކަމުގައި ވިދާޅުވެފައެވެ.

މިއަދުގެ ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވީ، ފްލެޓް ލިސްޓުގެ ސައްހަކަން ބެލުމަށް ކުރެވެމުންދާ މަސައްކަތް ނިމި މި ފެބްރުއަރީ މަސް ނިމުމުގެ ކުރިން ލިސްޓު އިޢުލާނު ކުރެވޭނެ ކަމަށެވެ. ރައީސް ވިދާޅުވީ، 4،000 މީހުންގެ ލިސްޓާއި މެދު އެންޓި ކޮރަޕްޝަން ކޮމިޝަން (އޭސީސީ) އިން އަންގާފައިވާ އެންގުންތަކާ އެކު، އެ ލިސްޓުގެ ސައްހަކަން ބެލުން ވެފައި އޮތީ ވަރަށް ހައްސާސީ މައްސަލައަކަށް ކަމަށެވެ.

ރައީސުލްޖުމްހޫރިއްޔާގެ ރިޔާސީ އިންތިޚާބުގެ ކެމްޕޭނުގެ ތެރޭގައި ވިދާޅުވެފައި ވަނީ ކުރީ ސަރުކާރުން އިއުލާނުކުރި ލިސްޓާއި އެއްގޮތަށް ފްލެޓްތައް ދޫކުރައްވާނެ ކަމަށެވެ. އެެހެން ނަމަވެސް ސަރުކާރަށް އެއް އަހަރު ވީފަހުން ސަރުކާރުން ވަނީ އަނެއްކާވެސް ފްލެޓް ލިބިފައިވަނީ ފްލެޓް ލިބުން ހައްޤު ފަރާތްތަކަށްތޯ ބަލަން ފަށާފައިވާ ކަމަށް ވިދާޅުވެފައެެވެ.