Advertisement
ރައީސުލްޖުމްހޫރިއްާގެ އެސްޓޯނިއާ ދަތުރުފުޅުގެ ތެރެއިން --
ރައީސްގެ އެސްޓޯނިއާ ދަތުރުފުޅަށް މިލިޔަނެއް ޚަރަދުވި
ހުސްވި ޖެނުއަރީ މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެސްޓޯނިއާއަށް ކުރެއްވި ދަތުރުފުޅަށް މިލިޔަނަކަށްވުރެ ގިނަ ރުފިޔާ ޚަރަދުވެފައިވާ ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.
ރައީސުލްޖުމްހޫރިއްޔާ އެސްޓޯނިއާއަށް ކުރެއްވި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގެންނެވިއެވެ.
އެދަތުރުފުޅުގެ ޚަރަދުގެ ތަފްސީލް ހާމަނުކޮށް އެއޮފީހުން މިއަދު ވިދާޅުވީ، އެ ދަތުރުފުޅަށް ޖުމުލަ އެއް މިލިޔަން ތިންލައްކަ ހަތްދިހަ އެއްހާސް ފަސްދޮޅަށް ނުވަރުފިޔާ ޚަރަދުވެފައިވާ ކަމަށެވެ.
ރައީސުލްޖުމްހޫރިއްޔާ އެސްޓޯނިއާއަށް ވަޑައިގަތަކީ އެ ގައުމުގެ ރައީސް ޑރ. އަލާރް ކަރިސްގެ ދައުވަތަކަށްކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވާފައި ވެއެވެ.
މިދަތުރުފުޅުގައި އެސްޓޯނިއާ ސަރުކާރާއި ދިވެހި ސަރުކާރާއި ދެމެދު ތިން އެއްބަސްވުމެއްގައި ސޮއެކުރައްވާފައިވާއިރުދެ ޤައުމުގެ އެންމެ އިސްވެރިންގެ މެދުގައި މަތީފަންތީގެ މަޝްވަރާތައް ބާއްވަވާފައި ވެއެވެ.
އަދި އެ ދަތުރުފުޅުގައި ބޭއްވުނު، އުފެއްދުންތެރި ބައްދަލުވުންތަކާއި، ޑިޖިޓަލައިޒޭޝަނާއި، ތިމާވެށި އަދި ސިޔާސީ ދާއިރާއިން ވެފައިވާ ފަހުމުނާމާތަކުން ދެ ޤައުމުގެ ގުޅުން ބަދަހިވުމުގެ އައު ދައުރެއް ފެށިގެން ހިނގައްޖެކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
