ޓޫރިސްޓުން ގޮވައިގެން ފެހުރިހި ބަލަން ދާ ނަމަ އެ އުޅަނދެއްގެ ބުރަފަތީގައި ޕްރޮޕެލާ ގާޑު އެޅުވުމަކީ މަޖުބޫރުކަމެއްގެ ގޮތުގައި ސަރުކާރުން ކަނޑައަޅައި ޤަވާއިދު އިސްލާޙްކޮށްފިއެވެ.

މިގޮތަށް ޤަވާއިދު ބަދަލުކޮށްފައި ވަނީ، ފެހުރިހި ބަލަންދާ ފަތުރުވެރިންގެ ގައިގައި، އިންޖީނު އުޅަނދު ފަހަރުގެ ބުރަފަތިންޖެހި ފަތުރުވެރިން މަރުވުމުގެ ހާދިސާތައް ހިނގުން އިތުރުވެފައިވާ ދަނޑިވަޅެއްގައެވެ. ފާއިތުވި ދެމަހުވެސް އެފަދަ ދެ ދެހާދިސާއެއް ވަނީ ހިނގާފައެވެ.

"ސައުތުއަރި މެރިން ޕްރޮޓެކްޓެޑް އޭރިއާ" (ސަންޕާ) އަކީ، އދ އަތޮޅުގެ ބޭރު ދުނި ހިމެނޭ، އަދި ރާއްޖޭގައި އެންމެ ގިނައިން ފެހުރިހި ފެންނަ ސަރަހައްދަށް ވުމާއިއެކު ފަތުރުވެރިންނަށް ފެހުރިހި ދައްކަން އެންމެ ގިނައިން ގެންދަނީ އެސަރަހައްދަށެވެ. އަދި އެންމެ ގިނަ ހާދިސާތައް ހިނގާފައި ވަނީވެސް އެ ސަރަހައްދުގައެވެ.

އެހެންވެ އެސަރަހައްދަށް ފަތުރުވެރިން ގޮވައިގެންދާ އުޅަނދުފަހަރު ރަޖިސްޓްރީވާންޖެހޭ ގޮތަށާއި، އަދި 3 މަސް ދުވަހުގެ ތެރޭގައި އުޅަނދުތަކުގައި ޕްރޮޕެލާ ގާޑު އެޅުވުން ލާޒިމްކޮށް ޤަވާއިދު ވަނީ އިސްލާޙްކޮށްފައެވެ.