ޗާގޯސްއާ ރާއްޖޭގެ އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަަޅާފައިވާ މައްސަލަ ރާއްޖޭން ބޭނުންވި ގޮތަށް ނިންމައިފިއެވެ.

މިމައްސަލައިގައި މޮރިޝަސްއިން ދައުވާކޮށްފައި ވަނީ ޗާގޯސްގެ ބްލެންހިމްފަރުން ފެށިގެން އުތުރަށް މިން އަޅައި އިޤުތިޞާދީ ސަރަހައްދު ބެހުމަށެވެ. އެހެން ނަމަވެސް ރާއްޖެއިން އެކަމަށް ވަނީ އިންކާރުކޮށްފައެވެ. މިމައްސަލައިގައި މައިގަނޑު ގޮތެއްގައި ދެޤައުމުގެ މެދުގައި ޚިލާފު އުފެދުނީ، ދެޤައުމަށް އެއްވަރަށް ކަނޑު ސަރަހައްދު ބެހުމުގައި ބޭސްޕޮއިންޓް ކަނޑައެޅުމާއި ގުޅޭ ގޮތުންނެވެ.

މިގޮތުން މިމައްސަލައިގައި ރާއްޖެއިން ފާހަގަކޮށްފައި ވަނީ ބްލެންހިމްފަރަކީ ހިކިދިޔައިގައި ނޫނީ ނުފެންނަ ފަރަކަށް ވުމުން ބޭސް ޕޮއިންޓްގެ ގޮތުގައި އެތަން ކަނޑަނޭޅޭނެ ކަމަށެވެ. މިމައްސަލައިގައި، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް)އިން ނިންމާފައި ވަނީ ރާއްޖޭގެ ކޮޅަށެވެ. އެހެންވެ ދެޤައުމުގެ ޚާއްސަ އިޤުތިޞާދީ ސަރަހައްދުގެ ތެރެއިން ފުށުއަރާ ސަރަހައްދު ބެހި އިރު، ރާއްޖެއަށް ވަނީ މިހާރު އޮތް ސަރަހައްދުގެ އިތުރަށް، 4600 އަކަ ކިލޯމީޓަރުގެ ސަރަހައްދެއް ލިބިފައެވެ.

ރާއްޖެއާ ޗާގޯސް އާކިޕެލެގޯގެ އިން ވަކިކުރުމުގެ މައްސަލައަކީ ބައިގަރުނަށްވުރެ ގިނަ ދުވަސްވެފެން ގޮސްފައިވާ މައްސަަލައެކެވެ. ޗާގޯސްގެ މިލްކުވެރިކަމާއި މެދު މޮރިޝަސްއިންވެސް އަދި އިނގިރޭސިވިލާތުންވެސް ދައުވާކުރެއެވެ. ޗާގޯސްގެ މިލްކުވެރިކަމާއި މެދު، އިންޓަނޭޝަނަލް ކޯޓް އޮފް ޖަސްޓިސްއިން ނިންމާފައި ވަނީ ޗާގޯސްއަކީ އިނގިރޭސީން އިސްތިޢުމާރުކޮށްފައިވާ، މޮރިޝަސްގެ ތަނެއް ކަމަށެވެ.