އެމެރިކާގައި މަތިންދާ ބޯޓަކާއި ހެލިކޮޕްޓަރެއް ޖެހިގެން ހިނގި ހިތާމަވެރި ހާދިސާއާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެމެރިކާގެ ރައީސް ޑޮނާލްޑް ޖޭ. ޓްރަމްޕަށް ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ ތައުޒިޔާގެ މެސެޖުގައި، މި ހާދިސާގައި ފުރާނަ ގެއްލިދިޔަ މީހުންގެ ޢާއިލާތަކަށާއި، އެމެރިކާ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ހަމްދަރުދީ ފޮނުއްވާފައިވެއެވެ. އަދި މި ހިތާމައިގެ ދަނޑިވަޅުގައި ދިވެހި ރައްޔިތުން އެމެރިކާއާއިއެކު ދެމިތިބިކަމުގެ ޔަޤީންކަންވެސް ރައީސުލްޖުމްހޫރިއްޔާ ދެއްވާފައިވެއެވެ.

ބުދަ ދުވަހުގެ ރޭގައި މިހާދިސާ ހިނގާފައި ވަނީ، ރޭގަން ވޮޝިންޓަން އިންނޭޝަނަލް އެއާޕޯޓުގައި ޖައްސަން ތިރިކުރަމުން ދިޔަ، އެމެރިކަން އެއާލައިންސްގެ ބޯޓުގައި ވައިގެ ތެރޭގައި ޖެހުނީ، ތިން ސިފައިންނާއެކު ދަތުރުކުރަމުންދިޔަ އެމެރިކާގެ އަސްކަރިއްޔާގެ ބްލެކް ހޯކު ހެލިކޮޕްޓަރެކެވެ. މިހާދިސާގައި މަތިންދާ ބޯޓާއި ހެލިކޮޕްޓަރުގައި ތިބި އެންމެން ވަނީ މަރުވެފައެވެ.

މިއީ ވައިގެ ތެރޭގައި ދެއުޅަނދެއްޖެހި އެމެރިކާގައި މި ފާއިތުވި 50 އަހަރުގެ ތެރޭގައި ހިނގި އެންމެ ހިތާމަވެރި ހާދިސާއެވެ.