ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ މިސަރުކާރު ވެރިކަމަށް ގެނައުމަށް، މައި ޕާޓީއެއްގެ ގޮތުގައި ބޭނުން ކުރި، ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމް އުވާލައިފިއެވެ.

އިލެކްޝަންސް ކޮމިޝަނުން ޕީޕީއެމް އުވާލައި އެޕާޓީ ސިޔާސީ ޕާޓީތަކުގެ ދަފްތަރުން އުނިކޮށްފައި ވަނީ ބުރާސްފަތި ދުވަހުގައެވެ.

އިލެކްޝަންސް ކޮމިޝަނުން ޕީޕީއެމް އުވާލާފައި ވަނީ، އެޕާޓީގެ ސެނެޓުން ޕާޓީ އުވާލުމަށް ނިންމައި، ޕާޓީގެ ފަރާތުން އެކަން އިލެކްޝަންސް ކޮމިޝަނަށް ހުށައެޅުމާއި ގުޅިގެން ކަމުގައި އިލެކްޝަންސް ކޮމިޝަނުންވެސް ވަނީ ހާމަކުރައްވާފައެވެ.

އިލެކްޝަންސް ކޮމިޝަނުން އިއްޔެ ކުރި އިއުލާނެއްގައި ބުނީ ޖެނުއަރީ 30 ވަނަ ދުވަހުން ފެށިގެން ސިޔާސީ ޕާޓީތަކުގެ ދަފްތަރުން ޕީޕީއެމް އުނިކޮށްފައިވާ ކަމަށެވެ. ޕީޕީއެމްއަކީ 2013 ވަނަ އަހަރުން 2018 ވަނަ އަހަރަށް ރާއްޖޭގައި ވެރިކަން ކުރި ޕާޓީއެވެ. އަދި އޭރު ރާއްޖޭގައި އޮތް އެންމެ ބޮޑު ސިޔާސީ ޕާޓީއެވެ. ޕީޕީއެމް އުވާލިއިރުވެސް އެޕާޓީގެ ދަފްތަރުގައި 30000 ވުރެ ގިނަ މެމްބަރުން ތިއްބެވެ.

ޕީޕީއެމް އުވާލުމަށް ފަހު، މިހާރު ސަރުކާރު ހިންގާ ޕާޓީ ޕީއެންސީ އިންދަނީ، ޕީޕީއެމްގެ މެމްބަރުން އެޕާޓީއަށް ބަދަލުކުރުމަށް މަސައްކަތް ކުރަމުންނެވެ. ޕީއެންސީގެ މެމްބަރުން އިތުރު ކުރުމަށް ކުރަމުންދާ މަސައްކަތްތަކުގައި ގިނަ އަދަދެއްގެ ވަގި ފޯމްތައް އިލެކްޝަންސް ކޮމިޝަނަށް ހުށައެޅި މައްސަލައެއްވެސް ވަނީ ފެންމަތިވެފައެވެ.