އުލިގަމުގެ ތަރައްޤީއަށް އެންމެ މުހިއްމު ވެފައިވާ، ޔޮޓް މެރީނާ ތަރައްޤީކުރުމުގެ މަސައްކަތް އަންނަ ފެބްރުއަރީ މަހު ފެށިގެންދާނޭ ކަމުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްެޖެއެވެ.

އުލިގަމުގެ ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، އުލިގަމުގެ ތަރައްޤީއަށް، ޔޮޓް މެރީނާއެއް ތަރައްޤީކުރުމުގެ މަސައްކަތް ފެބްރުއަރީ މަހު ފެށިގެންދާނޭކަން އިޢުލާންކުރައްވާފައެވެ. އަދި، ސްޕޯޓްސް ފިޝިންގއަށް ބޭނުންވާ ބޮއިވެސް، ފެބްރުއަރީ މަހު ހަރުކުރެވި، އޭގެ ފައިދާ އުލިގަމު ރައްޔިތުންނަށް ލިބިގެންދާނޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން، އުލިގަމު ރައްޔިތުން އެންމެ ބޮޑަށް އެދޭ އެއް ކަމަކީ އެރަށު ޞިއްޙީ މަރުކަޒުގެ ފެންވަރު ރަނގަޅުކުރުން ކަމަށާއި، އެކަމަށް ޙައްލެއް ހޯއްދެވުމުގެ ގޮތުން، އެމް.ޓީ.ސީ.ސީ އާއި ހަވާލުކުރެވިގެން އެމަސައްކަތް އަންނަ މަހު ފެށިގެންދާނޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

އުލިގަމަށް ކުރެއްވި ދަތުރުފުޅުގައި ރައީސުލްޖުމްހޫރިއްޔާ ވަނީ އުލިގަމު ޞިއްޙީ މަރުކަޒަށް ޒިޔާރާތްކުރައްވައި، އެ މަރުކަޒުގެ ޚިދުމަތްތަކާއި މަރުކަޒުގައި ޚިދުމަތްދިނުމަށް ހުރި ގޮންޖެހުންތަކާއި ބެހޭގޮތުން މަޢުލޫމާތު އޮޅުންފިލުއްވާފައެވެ.

އުލިގަމަކީ، ރާއްޖެއަށް ޒިޔާރަތްކުރާ އެންމެ ގިނަ އުޅަނދުތައް ބަނދަރު ކުރާ ރަށެވެ. އެރަށުގައި ޒަމާނީ ޔޮޓުމެރީނާއެއް ތަރައްޤީކުރުމަކީ އުތުރުގެ އިޤުތިޞާދަށް މުހިއްމު ކަމެއްގެ ގޮތުގައި ހުރިހާ ސަރުކާރަކުންވެސް ފާހަގަކޮށްފައިވެއެވެ. އެހެންނަމަވެސް މިހާތަނަށް އުލިގަމުގައި ޔޮޓު މެރީނާއެއް ތަރައްޤީކުރުމަށް އެކަށީގެންވާ ގޮތެއްގައި މަސައްކަތްތައް ކުރެވިފައެއް ނުވެއެވެ.