ހއ. ހޯރަފުށި އެއާޕޯޓް އިންޓަނޭޝަނަލް ކޮށްދިނުމަށް އެރަށު ކައުންސިލުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހުން އެދިއްޖެއެވެ.

އެކައުންސިލުން މިކަމަށް އެދިފައި ވަނީ،  ރައީސުލްޖުމްހޫރިއްޔާ އެކައުންސިލްގެ މެމްބަރުންނާއި އ.ތ.މ ކޮމިޓީއާއެކު ބޭއްވެވި ބައްދަލުކުރެއްވުމުގައެވެ. މިބައްދަލުކުރެއްވުން އޮތީ ހއ. ހޯރަފުށީ ކައުންސިލް އިދާރާގައެވެ.

ހޯރަފުށީ އެއާޕޯޓު އިންޓަރނޭޝަނަލް އެއާޕޯޓަކަށް ހައްދަވައި ދެއްވުމަށް އެރަށުގެ ކައުންސިލުން އެދުނުއިރު ހދ. ހަނިމާދޫ އެއާޕޯޓަކީ އިންޓަރނޭޝަނަލް އެއާޕޯޓެކެވެ. އަދި ހޯރަފުއްޓާއި ގާތުގައި އޮތް ދިއްދޫގައިވެސް ސަރުކާރުން ވަނީ ޑޮމެސްޓިކް އެއާޕޯޓެއް އެޅުުގެ މަސައްކަތް ފައްޓަާފައެވެ. 

މި ބައްދަލުކުރެއްވުމުގައި ހޯރަފުށި ކައުންސިލުން ވަނީ، ހޮސްޕިޓަލްގެ މަސައްކަތް އަވަސްކޮށްދެއްވުމަށާއި ރަށުގެ ކުނީގެ މައްސަލައަށް ހައްލެއް ހޯދައިދެއްވުމަށް ރައީސުލްޖުމްހޫރިއްޔާއަށް ދަންނަވާފައެވެ. އަދި ބޯހިޔާވަހިކަމުގެ މައްސަލައަށް ހައްލެއް ހޯދުމަށްޓަކައި އެ ރަށުގެ ބިން ހިއްކަވައިދެއްވުމަށާއި، ހޯރަފުށީ ބަނދަރުގެ ޖާގައިގެ ދަތިކަން ހައްލުކޮށްދެއްވުމަށާއި، ހޯރަފުށީ އެއަރޕޯޓް ބައިނަލްއަޤްވާމީ އެއާޕޯޓަކަށް ހައްދަވައި ދެއްވުމަށާއި، އިސްލާމިކް ސެންޓަރެއް ޤާއިމުކޮށްދެއްވުމަށްވެސް ކައުންސިލްގެ ފަރާތުން ވަނީ ރައީސަށް ދަންނަވާފައެވެ.

މީގެ އިތުރުން ރަށުގެ އިޚްތިޞާޞްގައި ހުވަންދޫ ހިމަނައިދެއްވުމަށްވެސް އެ ކައުންސިލުން ރައީސުލްޖުމްހޫރިއްޔާއަށް ވަނީ ދަންނަވާފައެވެ.