ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިނިސްޓަރ އޮފް ޓޫރިޒަމްގެ މަގާމުގައި ހުންނެވި އިބްރާހީމް ފައިޞަލް، އެ މަގާމުން ވަކިކުރައްވައިފިއެވެ.

ފައިސަލް އެމަޤާމުން ވަކި ކުރައްވާފައި މިވަނީ، ފައިސަލް މަޤާމުން ވަކިކުރައްވަން އުޅޭ ކަމުގެ އަޑުތަކެއް ފެތުރެމުންދާތާ ކުޑަ ދުވަސްކޮޅެއްވީ ފަހުންނެވެ. ފައިސަލް މަޤާމުން ވަކިކުރެއްވި ވަކި ސަބަބެއް ރައީސުލްޖުމްހޫރިއްޔާގެ އޮފީހުން ހާމަކުރައްވާފައެއް ނުވެއެވެ. އެހެން ނަމަވެސް އެމިނިސްޓްރީ ހިނގުން ވަގުތީ ގޮތުން، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދުއާ ވަނީ ހަވާލުކުރައްވާފައި ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވެއެވެ.

ރައީސުލްޖުމްހޫރިއްޔާ މިއަދު މަޤާމުން ވަކިކުރެއްވި ޓުއަރިޒަމް މިނިސްޓަރ އިބްރާހީމް ފައިސަލަކީ، ރައްޔިތުންގެ މަޖިލީހުގެ ރައީސް އަބުދުއްރަހީމް ޢަބްދުﷲގެ ދޮށީ ފިރިހެން ދަރިފުޅެވެ. ރައީސުލްޖުމްހޫރިއްޔާ ކަމުގެ މަޤާމަށް ޑރ.މުހައްމަދު މުޢިއްޒަށް ވަޑައިގެންނެވުނީ، މަޖިލީހުގެ ރައީސް ޢަބުދުއްރަހީމް ޢަބުދުﷲ ދެއްވި ތާއީދާއި އެއްބާރު ލެއްވުމުގެ ސަބަބުން ކަމުގައި ވީނަމަވެސް އެދެބޭފުޅުން ގުޅުން މިހާރު ވަނީ ވަރަށް ބޮޑަށް ގޯސްވެފައި ކަމުގައި ޚަބަރުތައް ބުނެއެވެ.