ޖަނަވަރީ 25 ދުވަހު ސަންއޮންލައިންއަށް ދެއްވި އިންޓަރވިއުގައި މިޑިޔާ ރެގިއުލޭޓްކުރުމާބެހޭ ގޮތުން ދެއްކި ވާހަކައިގެ ހަޤީޤީ މަފްޙޫމް އޮޅުން އަރާފަދަ ގޮތަކަށް ބައެއް މީޑިޔާތަކުން ޚަބަރުތައް ފަތުރަމުން އަންނަ ކަމުގައި ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަޙްމަދު ނާޒިމް ވިދާޅުވެއްޖެއެވެ.

އެކަމާއި ގުޅޭ ގޮތުން މަޖިލީހުގެ ނައިބު ރައީސް ވަނީ ބަޔާނެއްވެސް ނެރުއްވާފައެވެ. އަދި އެފަދަ ކަންކަމުގައި ރައްޔިތުންނަށް ހަޤީޤަތް އޮޅޭ ފަދަ، ފިތުނަވެރިގޮތަކަށް ޚަބަރާއި މައުލޫމާތު ނުފެތުރުމަށް، އެބަޔާނުގައި ރާއްޖޭގެ މީޑިއާތަކަށް ނާޒިމް ގޮވާލައްވާފައިވެއެވެ.

ނާޒިމްގެ ބަޔާނުގައި ވިދާޅުވީ، އެއްވެސް ސޯޝަލް މީޑިއާގެ މަންސައެއް ބްލޮކް ކުރުމަށް ހުށަނާޅުއްވާ ކަމަށާއި އެހެން ނަމަވެސް ސޯޝަލް މީޑިއާއަކީ ރެގިއުލޭޓް ކުރެވެންވާނެ އެއްޗެއްކަަމަށް ދެކެވަޑައިގަންނަވާ ކަމަށެވެ. އަދި ސޯޝަލް މީޑިއާއަކީ ބޭނުން ކުރެވޭ މީޑިއާގެ އެންމެ އާއްމު ވަސީލަތްތައްވެސް ނާޒިމް ވަނީ ފާހަގަކުރައްވާފައެވެ. 

ނާޒިމް ވިދާޅުވީ ސޯޝަލް މީޑިއާގެ ވަސީލަތްތައް ރެގިއުލޭޓްކޮށް، އެހެން މީހުންގެ ހައްޤުތަކާއި ޢަބުރާއި ޢިއްޒަތާއި ކަރާމާތް ރައްކާތެރި ކުރެވޭނޭ ޤާނޫނީ އޮނިގަނޑެއް އޮންނަން ޖެހޭނެ ކަމަށެވެ. އެގޮތުން އެފަދަ ބައެއް ޤާނޫނުތައް ޔޫރަޕްގެ ޤައުމުތަކުގައިވެސް އޮންނަކަން ނާޒިމް ވަނީ ފާހަގަކުރައްވާފައެވެ.

ރާއްޖޭގައި ސޯޝަލް މީޑިއާގެ ވަސީލަތްތައް ނުހަމަ ގޮތުގައި ބޭނުން ކުރުމާއި، ސޯޝަލް މީޑިއާގެ ވަޞީލަތްތައް ބޭނުންކޮށްގެން މީހުންނަށް އިންޒާރުދީ ބިރުދެއްކުމާއި، މީހުންގެ އަބުރާއި ޢިއްޒަތް ނަގާލުމަށް ކަނޑައެޅިގެން ދޮގުވާހަކަތައް ފެތުރުމަކީ އާއްމުވެފައިވާ ކަމެކެވެ.