ނޫސްވެރިކަމާ އިންޓަރނެޓް ރެގިއުލޭޓް ކުރާ ބިލެއް ތަޢާރަފް ކުރާކަށް ސަރުކާރުން އެއްވެސް މަސައްކަތެއް ނުކުރާ ކަމުގައި ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ، "ސަން މީޑިއާ" އަށް ދެއްވި އިންޓަވިއުއެއްގައި މަޖިލީހުގެ ނައިބު ރައީސް އަޙްމަދު ނާޒިމް ދައްކަވާފައިވާ ވާހަކަފުޅުތަކަކާއި ގުޅިގެން ޝާއިޢުކޮށްފައިވާ ޚަބަރުތަކާއި ގުޅޭ ގޮތުން ސަރުކާރުގެ ސިޔާސަތު ހާމަކުރައްވައި އެކްސްގައި ކުރެއްވި ޕޯސްޓުގައެވެ. ނާޒިމް ވަނީ ފަހުން ބަޔާނެއް ނެރުއްވައި އޭނާ ދެއްކެވި ވާހަކަފުޅުތައް ނޫސްތަކުން ގެނެސްދީފައި ވަނީ އަސްލުއޮޅޭ ގޮތަށް ކަމުގައި ވިދާޅުވެފައެވެ.

ހީނާ ވިދާޅުވީ، ސަރުކާރުގެ ލެޖިސްލޭޓިވް އެޖެންޑާގައިވެސް އެފަދަ ބިލެއް ހިމެނިފައި ނުވާނެ ކަމަށާއި ކުރިއަށްއޮތް ތަނުގައިވެސް އެފަދަ ބިލެއް ތަޢާރަފް ކުރުމުގެ ވިސްނުމެއްނެތް ކަމަށެވެ. ކުރިންވެސް ހާމަކުރައްވާފައިވާ ގޮތަށް މީޑިއާތައް ޑީ ރެގިއުލޭޓް ކުރުމާއެކު ސެލްފް ރެގިއުލޭޓަރީ ނިޒާމަކަށް ފުރުސަތު ދިނުން އެއީ ސަރުކާރުގެ ސިޔާސަތު ކަމުގައި ހީމާ ވިދާޅުވިއެވެ. މިސަރުކާރުގެ އެންމެ ފުރަތަމަ ދުވަހުން ފެށިގެންވެސް އެންމެ އިސްކަންދޭ ސިޔާސަތަކީ މީޑިއާގެ މިނިވަންކަން އެންމެ ފުޅާ ދާއިރާއެއްގައި ޤާއިމްކޮށް ދެމެހެއްޓުން ކަމުގައިވެސް ހީނާ ވަނީ ވިދާޅުވެފައެވެ.