މާލޭ މަޖީދީ މަގުގައި ހުރި ފިހާރައެއްގެ ގުދަނުގައި ރޯވެ އަނދައިފިއެވެ.

އަލިފާން ރޯވީ މއ. ސްޕްރިން ރިވާ ނަމަކަށް ކިޔާ ގޭގައި ހަދާފައި ހުރި، ފުރުޓް ޓްރީ ފިހާރަ އާއި އެފިހާރައިގެ ގުދަނުގައެވެ. އެއީ މަދުގެ ބާވަތްތަކާއި ޗޮކްލެޓް ވިއްކާ ފިހާރައެކެވެ.

އެމްއެންޑީއެފުން ވިދާޅުވީ، އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް މި ހާދިސާގެ މަޢުލޫމާތު ލިބިފައި ވަނީ ރޭފަތިހު 04:20 ހާއިރު ކަމަށާއި މައުލޫމާތު ލިބުމާއިއެކު ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައި ކަމަށެވެ. މިގޮތުން ފަޔަރފައިޓަރުން ކުރި މަސައްކަތުން ރޯވެފައިހުރި އަލިފާން ކޮންޓްރޯލްކުރެވުނީ ފަތިހު 05:27 ހާއިރުއެވެ. އަދި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރު ކަމުގައި އެމްއެންޑީއެފުން ވިދާޅުވެފައި ވެއެވެ.

އަލިފާން ރޯވި ބަޔަކީ، ލަކުޑި ޑެގު އަަޅައިގެން ހަދާފައި ހުރި ތަނެކެވެ. އެތަނުގެ ސަަބަބުން ލިބިދާނެ އިތުރު ގެއްލުމަކަށްޓަކައި ހަވީރު އެމްއެންޑީއެފްގެ އޮފިސަރުން ވަނީ އެ އިމާރާތުގައި އަލިފާން ރޯވިބައި ރޫޅާލާފައެެވެ.