ށ. އަތޮޅު ކައުންސިލުން އެއަތޮޅު ގޮއިދޫގައި އޮޓޯޕޮޓް ގްރީންހައުސް ފާމެއް އެޅުމުގެ މަސައްކަތް ފަށައިފިއެވެ.

ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވިދާޅުވާ ގޮތުގައި، އެ މަޝްރޫޢުގެ ދަށުން ށ. ގޮއިދޫގައި 1000 އަކަފޫޓުގެ 2 އޮޓޯޕޮޓް ގްރީންހައުސް ފާމް ޤާއިމް ކުރާނެއެވެ. މި މަޝްރޫޢަކީ އަތޮޅު ކައުންސިލުން 450,120.00 ރުފިޔާ (ހަތަރުލައްކަ ފަންސާސް ހާސް އެއްސަތޭކަ ވިހި ރުފިޔާ) ޚަރަދުކޮށްގެން، ޕްރައިމް ފާރޓިލައިޒަރސް މޯލްޑިވްސްއާއި ހަވާލުކޮށްގެން ހިންގާ މަޝްރޫޢެކެވެ.

މިއީ ށ. އަތޮޅުގައި ޒަމާނީ ދަނޑުވެރިކަން ތަޢާރަފްކޮށް، ރައްޔިތުން ދަނޑުވެރިކަމަށް ޝައުޤުވެރިކުރުވުމުގެ މަޤްޞަދުގައި ކުރިޔަށް ގެންދާ މަޝްރޫއެކެވެ.

މި މަޝްރޫޢުގެ ސަބަބުން ށ. އަތޮޅުގައި ޒަމާނީ ދަނޑުވެރިކަން ކުރިއަރައި، ރައްޔިތުންނަށް އިތުރު ވަޒީފާގެ ފުރުޞަތުތަކެއް ހުޅުވިގެންދާނެކަން ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވަނީ ފާހަގަކުރައްވާފައެވެ. 

އެވުޒާރާގެ އަމާޒަކީ ދަނޑުވެރިކަމުގެ ސިނާއަތް ފުޅާވެ، ކާނާއަށް ބޭރު ޤައުމުތަކަށް ބަރޯސާ ވާ މިންވަރު ކުޑަކޮށް ރައްކާތެރި ކާބޯތަކެތި އަޅުގަނޑުމެންގެ ދަނޑު ފަނގު ތަކުން ލިބިގެން ދާނޭ މަގުފަހި ކުރުން ކަމަށާއި، އެ އަމާޒަށް ވާސިލްވުމަށް ފަރުދީގޮތުންނާއި ޖަމިއްޔާ ޖަމާއަތްތަކުން އިސްނަންގަވައިގެން އެ ފަދަ މަޝްރޫޢުތައް ހިންގުމަކީ މި ވުޒާރާއިން ނުހަނު ބަލައިގަންނަ، އަދި ހިތްވަރުދޭ ކަމެއް ކަމުގައިވެސް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ވަނީ ވިދާޅުވެފައެވެ.