ކ. ކާށިދޫގެ ކުރީގެ ހުކުރު މިމިސްކިތުގެ އަޑިން ފެނުނު، އިހުގެ ބިނާއެއްގެ ތަރާގަނޑު ދިރާސާކުރުމުގެ މަސައްކަތް ފަށައިފިއެވެ.

މިނިސްޓްރީ އޮފް ދިވެހި ލޭންގުއޭޖް ކަލްޗާ އެންޑް ހެރިޓޭޖުން ހާމަކުރައްވާފައިވާ ގޮތުގައި، އެތަނުގެ ފެނުނު ތަރާގަނޑު ދިރާސާކުރުމުގެ މަސައްކަތް ކުރަމުން ދަނީ ކަމާއި ގުޅޭ ބޭރުގެ ފަންނީ ފަރާތްތަކާއިވެސް ގުޅިގެންނެވެ.

މިގޮތުން، މިމަސައްކަތުގައި ސަގާފީ ތަރިކަ ރައްކާތެރިކުރުމާ ބެހޭ ޤައުމީ މަރުކަޒާއި ޔުނިވާސިޓީ އޮފް އީސްޓް އެންގްލިއާއި ދިވެހިބަހުގެ އެކެޑަމީ އަދި މެރިޓައިމް އޭޝިޔާ ހެރިޓޭޖް ސާވޭ ގުޅިގެން ކުރިއަށް ގެންދާ މި މަސައްކަތުގައި ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ މުވައްޒަފުންގެ އިތުރުން، ދިވެހިބަހުގެ އެކަޑަމީގެ މުވައްޒަފުންނާއި މެރިޓައިމް އޭޝިއާ ހެރިޓޭޖް ސާވޭގެ ޓީމާއި ޔުނިވާސިޓީ އޮފް އީސްޓް އެންގްލިއާ އިން މާސްޓާސް އިން ދަ އާޓްސް އޮފް އެފްރިކާ އަދި އޯޝަނިއާ އެންޑް ދަ އެމެރިކާސް ވިތު ސެއިންސްބަރީ ރިސާޗް ޔުނިޓްގެ ފަރާތުން ބައިވެރިވެފައިވާ ކަމުގައި އެމިނިސްޓްރީން ހާމަކުރައްވާފައިވެއެވެ.

ކާށިދޫ ބައު މިސްކިތުގެ އަޑިން ފެނިފައި ވަނީ ހިރިގަލުގެ ތަރާގަނޑުތަކެކެވެ. ބެލެވިފައިވާ ގޮތުގައި އެއީ ކުރިން އެތަނުގައި ހުރި މިސްކިތެއް ނުވަތަ ބުދުފައްޅިއެއްގެ ބައިތަކަކަށް ވުން އެކަށީގެންވެއެވެ.

ކ. ކާށިދޫއަކީ، ރާއްޖެ އިސްލާމްވުމުގެ މާކުރިން ފެށިގެންވެސް، މީހުން އާބާދުވެ ދިރިއުޅެމުން އަންނަ ރަށެކެވެ. އެވޭލާ ޒަމާނުގެ ބުދުފައްޅިއެއްގެ ބިނާތަކުގެ ތަރާގަނޑުތައް މީގެ ކުރިންވެސް ކާށިދޫއިން ފެނިފައި ވެއެވެ. 

މިހާރު ދިރާސާކުރަމުން އަންނަ ތަރާގަނޑު ފެނިފައި ވަނީ 2022 ވަނަ އަހަރުގައެވެ.