ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުސްވި ޑިސެމްބަރު މަހުގެ ތެރޭގައި ވަޒީރުންގެ މަޖިލީހަށް ގެންނެވި ބަދަލުތަކާއި އެކު އަލުން ވަޒީރުންގެ މަޖިލީހަށް ޢައްޔަނު ކުރެއްވި 4 ވަޒީރުންނަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

ވަޒީރުންނަށް ރުހުން ދީފައި ވަނީ ދައުރުން ބޭރުން މިއަދު ބޭއްވި  ރައްޔިތުންގެ މަޖިލީހުގެ ދެވަނަ ޖަލްސާގައެވެ. މިޖަލްސާގައި ރުހުން ދެއްވާފައި ވަނީ، މިނިސްޓަރ އޮފް ފިނޭންސް އެންޑް ޕްލޭނިންގ، މޫސާ ޒަމީރާއި، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ ޢަލީ ޙައިދަރު އަޙްމަދާއި، މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބަށާއި އަދި، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ، ޑޮކްޓަރ މަރްޔަމް މާރިޔާއަށެވެ.

މިވަޒީރުންގެ ތެރެއިން، ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ ޢަލީ ޙައިދަރު އަޙްމަދު ފިޔަވައި، އަނެއް ތިން ވަޒީރުންނަށް ރައްޔިތުންގެ މަޖިލީހުން ރުހުން ދެއްވާފައި ވަނީ ވޯޓުގައި ބައިވެރިވެވަޑަިއގެންނެވި މެމްބަރުންގެ އިއްތިފާޤުންނެވެ. މިނިސްޓަރ، ޑރ. ޢަލީ ޙައިދަރަށް ރުހުންދިނުމާއި ދެކޮޅަށް 6 މެމްބަރުން ވޯޓު ދެއްވިއެވެ.

ޑިސެމްބަރު މަހުގެ 12 ވަނަ ދުވަހު، މާލޭގައި ހިނގި އަލިފާނުގެ ހާދިސާގައި 3 މިނިސްޓްރީއެއް ހިންގަމުން އައި އޮފީސްތައް އަނދައިގެން ދިޔުމާއި އެކު، ރައީސުލްޖުމްހޫރިއްޔާ ވަޒީރުންގެ މަޖިލީހަށް ބަދަލުގެނެސް، އަލުން ވަޒީރުކަމުގެ މަޤާމަށް މިބޭބޭފުޅުން ޢައްޔަނު ކުރެއްވީ ހުސްވި އަހަރުގެ ޑިސެމްބަރު މަހުގެ 26 ވަނަ ދުވަހުގައެވެ.