މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންގެ ޚިޔާނާތުގެ މައްސަލަތަކާއި ގުޅިގެން، އެޚީޔާނާތުގެ އެންމެ އިސް މީހުންނާއި އެކު، ޕްރޮސިކިއުޓަރ ޖެނެރަލް އޮފީހުން އެކުލަވާލާފައިވާ އިމިޔުނިޓީ އަދި އެއްބާރުލުންދިނުމުގެ އެއްބަސްވުންތައް ބާޠިލްކޮށްފިއެވެ.

ޕީޖީ އޮފީހުން ހާމަކުރައްވާފައިވާ ގޮތުގައި އެއްބަސްވުންތައް ބާޠިލްކޮށްފައި ވަނީ، އެޚިޔާނާތުގައި އެންމެ އިސްދައުރެއް އަދާކޮށްފައިވާ، ކުރީގެ ނައިބު ރައީސް އަޙްމަދު އަދީބާއި، އަދި ޚިޔާނާތުގެ ފައިސާ އެކިފަރާތްތަކަށް ފޮނުވުމުގައި ބައިވެރިވި،  މ. ލޭންޑް އޮފް ގާރޑެން، އަޙްމަދު އިޝްފާޙް ޢަލީ އާއި މ. ސެސްނާ، މުޙައްމަދު ޢައްލާމް ލަޠީފް (މޮހޯ) އާއި ގ. އޮއިވާލި، މުޙައްމަދު ޙުސައިން (އޮއިއްޓޭ) އާއި އެކު ހަދާފާއި އެއްބަސްވުންތަކެވެ. 

ޕީޖީ އޮފީހުން ހާމަކުރައްވާފައިވާ ގޮތުގައި، މި އެއްބަސްވުންތައް ނިމުމަކަށް ގެނައުމަށް ޕްރޮސިކިއުޓަރ ޖެނެރަލް ނިންމަވާފައިވަނީ މި އެއްބަސްވުންތައް އެކުލަވާލާފައިވަނީ އެމް.އެމް.ޕީ.އާރ.ސީގެ ޚިޔާނާތުގެ މައްސަލައިގެ ތަޙުޤީޤު ކުރިއަށްގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައިކަމަށްވީނަމަވެސް، މި މީހުންގެ ފަރާތުން މައްސަލައިގެ ތަޙުޤީޤަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ލިބެމުން ނުދާކަމަށް ތަޙުޤީޤީ އިދާރާތުން މަޢުލޫމާތުދީފައިވާތީއެވެ.

މި އެއްބަސްވުންތައް ނިމުމަކަށް ގެނައުމާއެކު، މި އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި، މި މީހުންގެ މައްޗަށް ތުހުމަތުކުރެވޭ މައްސަލަތަކުގެ ތަޙުޤީޤު ކުރިއަށްގެންދަވައި، ވީ އެންމެ އަވަހަކަށް މި އޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި، އެންޓި-ކޮރަޕްޝަން ކޮމިޝަނަށް ދަންނަވާފައިވާ ކަމަށެވެ.

މީގެ ކުރިން، ޕީޖީން ވަނީ، އެމްއެމްޕީއާރްސީގެ ޚިޔާނާތުގައި ދައުވާކޮށް ޖަލަށްލި، ހ. އާހަމަ، ޢަބްދުالله ޒިޔާތުއާއެކު ވެފައިވާ އެއްބަސްވުން 2022 އޮގަސްޓު މަހުގެ ތެރޭގައި ނިމުމަކަށް ގެނެސްފައެވެ.