ބިދޭސީންގެ ބަޔޯމެޓްރިކް ޑާޓާ ނެގުމަށް މިހާރު ހިންގަމުން އަންނަ އޮޕަރޭޝަނުގައި މިހާތަނަށް 25000 ވުރެ ގިނަ ބިދޭސީންގެ މައުލޫމާތު އެއްކުރެވިފައިވާ ކަމުގައި ހޯމް މިނިސްޓްރީން ހާމަކުރައްވައިފިއެވެ.

އޮޕަރޭޝަން ކުރަނގީގެ ދަށުން އިއްޔެވަނީ މާލެ ސަރަހައްދުގައި ބިދޭސީންގެ ޑާޓާނެގުމުގެ ހަރަކާތްތަކެއް ހިންގާފައެވެ. އިއްޔެގެ އޮޕަރޭޝަނުގައި، މިނިސްޓްރީގެ 75 އޮފިޝަލުން ބައިވެރިވެރިވިއެވެ. މިގޮތުން، އިއްޔެ ހެނދުނު 9:15ން އިރުއޮއްސި 18:00ށް ގްރޭޓަރ މާލެ ސަރަޙައްދުގައި ކުރިއަށް ގެންދެވުނު "ކުރަނގި" އޮޕްރޭޝަންގައި 1455 ބިދޭސީ މަސައްކަތްތެރިންގެ ބަޔޯމެޓްރިކްސް ޑޭޓާ ވަނީ އެއްކުރެވިފައި ކަމުގައި އެމިނިސްޓްރީން ވިދާޅުވިއެވެ. މިއާއި އެކު މިހާތަނަށް މި އޮޕަރޭޝަންގައި ޖުމްލަ 25،483 ބިދޭސީންގެ މައުލޫމާތުވަނީ އެއްކުރެވިފައި ކަމުގައިވެސް މިނިސްޓްރީން ވަނީ ހާމަކުރައްވާފައެވެ.

އިއްޔެގެ އޮޕަރޭޝަނާއި ގުޅޭ ގޮތުން ހޯމް މިނިސްޓަރ ޢަލީ އިޙްސާން ވިދާޅުވީ، ރައީސް ޑރ. މުއިއްޒު ވައުދުފުޅާއި އެެއްގޮތަށް ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންެ މައްސަލައަށް ދާއިމީ ހައްލެއް ހޯދުމަށް ތިން އަހަރުގެ ޕްލޭނެއްގެ ދަށުން ކުރެވެމުންދާ މި މަަސައްކަތް 2027 ވަނަ އަހަރުގެ އޭޕްރިލް މަހުގެ ތެރޭގައި ނިންމައި ލެވޭނެ ކަމަށެވެ.

ސަރުކާރަށް އެއް އަހަރުވިއިރު މިމަސައްކަތުގައި އެއްކުރެވުނީ، 10،000 މީހުންގެ މައުލޫމާތު ކަމަށް ވީނަމަވެސް، މިފާއިތުވި ދެމަސް ދުވަހުގެ ތެރޭގައި، 15،000އަށްވުރެ ގިނަ ބިދޭސީންގެ މައުލޫމާތު މައުލޫމާތު އެއްކުރެވިފައިވާ ކަމުގައި މިނިސްޓަރ ވަނީ ފާހަގަކުރައްވާފައެވެ.