މިއަހަރުގެ ރޯދައަށް ސަޢޫދީއަރަބިއްޔާއިން ރާއްޖެއަށް ހަދިޔާކޮށްފައިވާ ކަދުރު އަންނަ އާދީއްތަ ދުވަހުންފެށިގެން ބަހަން ފަށާނެ ކަމުގައި މިނިސްޓްރީ އޮފް އިސްލާމިކް އެފެއާޒުން ހާމަކުރައްވައިފިއެވެ. 

އެމިނިސްޓްރީން ވިދާޅުވީ، އަންނަ ހޯމަ ދުވަހުންފެށިގެން، ފެބުރުއަރީ މަހުގެ 6 ވަނަ ދުވަހާއި ހަމައަށް ކަދުރު ބެހުން ކުރިޔަށް ގެންދާނެ ކަމަށެވެ. މިގޮތުން މާލެ ސަރަހައްދުގެ އާއްމު ގޭބިސީތަކަށް ކަދުރު ދޫކުރުން ކުރިޔަށްދާނީ، ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 9:30 އިން 13:00އަށް އިސްލާމީ މަރުކަޒުގައެވެ. އާއްމު ގޭބިސީތަކުގެ އިތުރުން ރަމަޟާންމަހުގެ ރޯދަ ވީއްލުމުގެ ހަރަކާތްތައް ކުރިޔަށްގެންދާ ޖަމިއްޔާ ޖަމާޢަތްތަކަށްވެސް ކަދުރު ދޫކުރުމަށް ހަމަޖައްސާފައިވާ ކަމުގައި އިސްލާމިކް މިނިސްޓްރީން ވަނީ ވިދާޅުވެފައެވެ.

ސަޢޫދީ ސަރުކާރުން ރާއްޖެއަށް ހަދިޔާކުރި 50 ޓަނުގެ ކަދުރު މިއަދު ވަނީ ރަސްމީކޮށް ދިވެހި ސަރުކާރާއި ހަވާލުކުރައްވާފައެވެ. ސަޢޫދީން ހަދިޔާކުރެއްވި ކަދުރާއި ހަވާލުވެވަޑައިގެންނެވީ އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްއެވެ.