މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރުކަމުގެ މަޤާމަށް ރުހުންދޭން ފެންނަކަމަށް، މިނިވަން މުއައްސަސާތަކާއި ބެހޭ ކޮމިޓީގެ ރިޕޯޓުގައި ފާހަގަކުރި، ޤާނޫނީ ވަކީލާ ޏ. ފުވައްމުލައް، އާސާން، ޝިފްޒާ މުސްތަފާ ކަޓުވާލައި، މަޝްހޫރު ކޮމޭޑިއަން މުޙައްމަދު ޢަބްދުﷲ (މުހަންމާ ކަލޯ) ކޮމިޝަނަށް ޢައްޔަނު ކުރުމަށް ރައްޔިތުންގެ މަޖިލީހުން މިއަދު ރުހުންދީފިއެވެ.

މޯލްޑިވްސް ބްރޯޑްކާސްޓިންގ ކޮމިޝަނަށް މެމްބަރުން ޢައްޔަނު ކުރެއްވުމަށް އެކަމަށް އެދި ހުށައެޅި ފަރާތްތަކުގެ ނަންފުޅުތައް ރައީސުލްޖުމްހޫރިއްޔާ މަޖިލީހަށް ފޮނުއްވި އިރު އެންމެ ކުރީގައި އޮތީ، މުހަންމާގެ ނަމެވެ. ދެވަނައަށް އޮތީ މުޢާޛު ޢަލީގެ ނަމެވެ. އެހެންނަމަވެސް މިނިވަން މުއައްސަސާތަކާއި ބެހޭ ކޮމިޓީން ނަންފުޅުތައް ދިރާސާކުރައްވައި އިންޓަވިއު ކުރެއްވުމަށްފަހުގައި މާކްސްދިން އިރު އެންމެ ކުރީގައި އޮތީ، ކުރިންވެސް އެކޮމިޝަންގެ މެމްބަރު ކަމުގެ މަޤާމު ފުރުއްވި، އައިމިނަތު ސަރާހަތު އިއްޒަތުގެ ނަމެވެ. ދެވަަނައަށް އޮތީ ޝިފްޒާ މުސްޠަފާގެ ނަމެވެ.

މިއަދުގެ މަޖިލީހުގެ ވޯޓުގެ ވަގުތުގައި އެންމެ ފުރަތަމަ ރުހުންދިނުމަށް ފެނޭތޯ އަހާފައި ވަނީ ސަރާހަތަށެވެ. ސަރާހަތަށް ރުހުންދޭން ފެންނަކަމަށް މަޖިލީހުގެ ވޯޓުގައި ބައިވެރިވެވަޑައިގެންވު 68 މެމްބަރުންގެ އިއްތިފާޤުން ފާސްކުރިއެވެ. ދެވަނައަށް ޝިފްޒާގެ ނަމަށް ވޯޓަށް އެހި އިރު، ޝިފްޒާއަށް ރުހުންދޭން ނުފެންނަ ކަމަށް ޕީއެންސީގެ 50 މެމްބަރުން ވޯޓުދެއްވިއެވެ. އެއާއެކު ތިންވަނައަށް މުހައްމާގެ ނަމަށް ވޯޓަށް އެހުމުން މަޖިލީހުގެ ވޯޓުގައި ބައިވެރިވެވަޑައިގެންނެވި 68 މެމްބަރުންގެ އިއްތިފާޤުން ފާސްކުރެއްވީ މުހަންމާއަށް ރުހުންދޭން ފެންނަ ކަމަށެވެ.

އަލްއުސްތާޛާ ސަރާހަތު ޢިއްޒަތާއި މުހަންމާ ކަލޯ ބްރޯޑްކާސްޓިންގ ކޮމިޝަނަށް ޢައްޔަނު ކުރަނީ، ކޮމިޝަންގެ ރައީސާ މަރިޔަމް ވަހީދާ އާއި ކޮމިޝަންގެ މެމްބަރު ޢަލީ ޔޫސުފްގެ ދައުރު ހަމަވެ އެކޮމިޝަންގެ ދެމެމްބަރެއްގެ މަޤާމު ހުސްވުމާއި ގުޅިގެންނެވެ.

މުހަންމާ ކަލޯ ބްރޯޑްކާސްޓިން ކޮމިޝަނަށް ޢައްޔަނުކުރަން ފާސްކުރުމާއި އެކު އާއްމުންގެ ފާޑުކިޔުންތައް ވަނީ އަމާޒުވެފައެވެ.