ޕީ.އެން.ސީ. އަށް މެންބަރުން އިތުރުކުރުމަށް އިލެކްޝަންސް ކޮމިޝަންއަށް ސައްހަނޫން ފޯމު ހުށަހެޅުމުގެ އެންމެހައި ކަމެއްގައި އިސްކޮށް ހަރަކާތްތެރިވެފައިވާތީ ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު މަގާމުން އެކަހެރިކުރަން އެމްޑީޕީން ގޮވާލައިފިއެވެ.

އެޕާޓީން ނެރެފައިވާ ބަޔާނުގައި ބުނެފައި ވަނީ، ޕީ.އެން.ސީ. އަށް މެންބަރުން އިތުރުކުރުމަށް ހިންގި ހަރަކާތުގައި ސައްހަ ނޫން ފޯމުތައް އިލެކްޝަންސް ކޮމިޝަނަށް ހުށަހަޅާފައިވާކަން އިލެކްޝަންސް ކޮމިޝަންގެ ބަހުންނާއި، ޕީއެންސީގެ އަމިއްލަ އިއުތިރާފުން ވަނީ ޝައްކެއް ނެތް މިންވަރަށް ސާބިތުވެފައި ކަމަށެވެ. އަދި މިކަން ހިނގައި ދިޔައީ އެކިފަރާތްތަކުން ހުށަހަޅާ ފޯމުތަކުގެ ސައްހަކަން ކަށަވަރުކުރުމުގެ ގާބިލުކަން އެޕާޓީގައި ނެތުމުގެ ސަބަބުންކަމަށް ޕީއެންސީން ބުނިނަމަވެސް، މިއީ ގަސްތުގައި ރާވައިގެން ހިންގާފައިވާ ޖަރީމާއެއްކަން މިހާރު ވަނީ ހާމަވެފައި ކަމުގައިވެސް އެމްޑީޕީން ވަނީ ބުނެފައެވެ. 

އެމްޑީޕީން ނެރެފައިވާ ބަޔާނުގައި ބުނެފައި ވަނީ، ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގެ މި ބޮޑު ޖަރީމާ ހިންގުމުގައި ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާނު އިސް ދައުރެއް އަދާކޮށްފައިވާތީ އެޕާޓީގެ ފަރާތުން މިނިސްޓަރުގެ އެ ހުތުރު އަމަލު ކުށްވެރިކުރާ ކަމަށެވެ. އަދި މިހާރު އާންމުވެފައިވާ ފޮޓޯތަކުން ފެންނަ ގޮތުގައި، ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައިދިޔައީ މިނިސްޓަރު އިހުސާނުގެ ސީދާ ބެއްލެވުމުގެ ދަށުންކަން އެނގޭ ކަމުގައިވެސް އެޕާޓީން ވަނީ ބުނެފައެވެ. 

އެމްޑީޕީން ވަނީ ފުލުހުންނާއި އޭސީސީންވެސް މިނިސްޓަރ އިޙްސާނުގެ މައްސަލަ ބެލުމަށް ގޮވާލާފައެވެ. އަދި ހޯމް މިނިސްޓަރުކަމުގެ މަޤާމުގައި އިޙްސާނު ހުންނަވައިގެން ފުލުހުންނަށް އިންސާފުވެރި ތަޙްޤީޤެއް ހިންގޭނެ ކަމަށް ޤަބޫލު ނުކުރާތީ، މިނިސްޓަރު އިޙްސާން މަޤާމުން އެކަހެރި ކުރުމަށްވެސް އެމްޑީޕީން ވަނީ ގޮވާލާފައެވެ.