ޗާންދަނީމަގާއި ދަނބުގޯޅި ގުޅޭ ކަންމަތީގައި ކުރިން ހަބީބް ބޭންކު ހުރި ބިމުގައި, ގެއެއްގެ އިމާރާތެއް އަޅަން ކޮންނަމުން ދަނިކޮށް އިހުޒަމާނުގައި މާލޭގައި ބޭނުން ކުރި ބޮޑު ބަޑިއެއް ފެނިއްޖެއެވެ.

ނޭޝަނަލް ސެންޓަރ ފޯރ ކަލްޗަރ ހެރިޓޭޖުން ވިދާޅުވީ، އެބޮޑު ބަޑި މިހާރު އެސެންޓަރަށް ގެނެސްފައިވާ ކަމަށާއި، އެކަމުގައި އެހީތެރިކަން ފޯރުކޮށްދެއްވި ފެޑޯ ކޮންސްޓްރަކްޝަން ކޮންޕެނީ އަށާއި ރައްޔިތުންގެ މަޖިލީހުގެ މައްޗަންގޮޅީ މެދު ދާއިރާގެ މެންބަރު އޮނަރަބަލް އަޙްމަދު ޟަމީރު އަށް އެ މަރުކަޒުގެ ފަރާތުން ޝުކުރުއާދަކުރާ ކަމަށެވެ.

ގެއެއްގެ ފައުންޑޭޝަން އެޅުމަށް ކޮންނަނިކޮށް ފެނިފައިވާ މި ބޮޑުބަޑިއަކީ، ރާއްޖޭގެ ރަސްކަމުގެ ޒަމާނުގައި މާލޭގެ ދިފާއަށް ބޭނުންކުރި ބާވަތުގެ ބޮޑުބަޑިއެކެވެ. އަދި ބަޑި ފެނުނު ސަރަހައްދަކީ، ކުރި ރަސްކަމުގެ ގަނޑުވަރުތަކުގެ ދޮރޯށިތައް ހުރި ސަރަަހައްދެއް ކަމުގައި ތާރީޚު ދިރާސާކުރައްވާ ބޭބޭފުޅުން ފާހަގަކުރައްވާފައި ވެއެވެ.