ވައިކަރަދޫ ދާއިރާގެ އެމްޑީޕީ މެމްބަރު ހުސައިން ޒިޔާދު ނަމުގައި ވަގު ފޯމެއް ހުށައަަޅައިގެން އޭނާ ޕީއެންސީއަށް ވައްދާފައިވާ މައްސަލަ ބަލަން އެމްޑީޕީން ގޮވާލައިފިއެވެ.

އެމްޑީޕީން އެކަމާއި ގުޅޭ ގޮތުން ނެރުނު ނޫސްބަޔާނުގައި ގޮވާލާފައި ވަނީ، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށެވެ. 

އެމްޑީޕީގެ ބަޔާނުގައި ބުނެފައި ވަނީ، ޕީއެންސީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ، އެ މައްސަލަތައް ތަކުރާރުކޮށް އިލެކްޝަންސް ކޮމިޝަނުގެ ސަމާލުކަމަށް ގެނެސްފައިވާ ކަމަށެވެ. އެ މައްސަލާގައި އިލެކްޝަންސް ކޮމިޝަން (އީސީ) އާއެކު ބޭއްވި ބައްދަލުވުމުގައި ވެސް މި ޕާޓީން ވާނީ ވަގު ފޯމެއް ބަލައިގަނެ، ރައްޔިތުންގެ މަޖިލީހުގެ މެމްބަރެއްގެ ޕާޓީ އީސީން ބަދަލުކޮށްފިނަމަ އެ މެމްބަރެއްގެ ގޮނޑި ގެއްލުމުގެ ފުރުސަތު ގާނޫނުއަސާސީއަށް މިފަހުން ގެނައި ބަދަލާއެކު އޮތްކަމުގެ ކަންބޮޑުވުންވެސް ޙިއްޞާކޮށްފައި ވާނޭ ކަމުގައި އެމްޑީޕީން ހާމަކޮށްފައިވެއެވެ. މީގެ އިތުރުން، ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ޕީއެންސީއަށް އެއް ލައްކަ މެމްބަރުން ހަމަކުރަން ކަމަށް ބުނެ މީހުންގެ ސޮއި ފޯޖުކޮށްގެން ހުށަހަޅަމުންދާ ފޯމުތައް ޕްރޮސެސް ކުރުން ހުއްޓާލުމަށް ވެސް އެމްޑީޕީން އީސީގައި އެދިފައިވާނޭ ކަމުގައި އެޕާޓީން ވަނީ ވިދާޅުވެފައެވެ.

އެމްޑީޕީން ތުހުމަތުކޮށްފައިވާ ގޮތުގައި ވަގުފޯމްތައް ހުށައަޅަމުން ދަނީ، ޑިޕާޓްމަންޓު އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާބޭސްއިން ވައްކަންކޮށްގެންނެވެ.