އދ. އަތޮޅު މިރިހި އައިލެންޑް ރިސޯޓް ކައިރީގައި އޮތް “ނޯތު 7” ނަމަކަށް ކިޔާ ސަފާރީ ކަނޑަށް ވެއްޓި ގެއްލުނު މީހާ މަރުވެފައި އޮއްވައި ފެނިއްޖެ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، ގެއްލުނު ދިވެހި މީހާގެ ހަށިގަނޑު، އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން، ކަނޑުގެ 69 މީޓަރު އަޑިން ހޯދާފައިވާ ކަމަށާއި، އަދި ޑައިވަރުންގެ ޓީމުން، އެ މީހާގެ ހަށިގަނޑު، 15:35 ހާއިރު ވަނީ ލޯންޗަށް ނަގާފައިވާ ކަމަށެވެ.

މިހާދިސާގައި މަރުވެފައި ވަނީ، "ނޯތު 07" ސަފާރީގެ ފަޅުވެރިއެއްގެ ގޮތުގައި މަސައްކަތް ކުރަމުން ދިޔަ، ނ. ހޮޅުދޫ، ސީވިޑް އަލީ އަރުޝަދު (35އ)އެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި އޭނާ ސަފާރީން ކަނޑައްވެއްޓުނީ، ސަފާރީގެ ޑެކްމަތީގައި ހުއްޓައެވެ. އަދި ވެއްޓުނު ވަގުތު ސަފާރީގެ ހަފޮޅުގައި އޭނާ ޖެހިފައިވާ ކަމަށާއި އެމަންޒަރުތައް ސަފާރީގެ ސީސީޓީވީ ކެމެރާއި ރެކޯޑްކުރެވިފައި ހުރިކަމުގައިވެސް ފުލުހުންގެ އިދާރާއިން ވިދާޅުވެފައިވެއެވެ.