ދިވެހި ފިލްމް "ނީނާ" އޮލިމްޕަހުގައި ރޭ ލޯންޗްކޮށްފިއެވެ. މިއީ ގިނަ އަދަދެއްގެ ބަޔަކު އިންތިޒާރުކުރަމުން އައި ފިލްމެކެވެ.

"ނީނާ" މި ފިލްމުގެ މަސައްކަތް އައި ފިލްމްސްއިން ފެށީ ކޯވިޑްގެ ކުރިންނެވެ. ނަމަވެސް ކޯވިޑްގެ ސަބަބުން ފިލްމުގެ މަސައްކަތްތައް މެދުކެނޑިފައި އޮތުމަށްފަހު، ސްކްރީނަށް ފިލްމް ގެނައުމަށް އިއުލާން ކުރި ހިސާބުން ބެލުންތެރިން ތިބީ ކެންމަދުވެފައެވެ.

ލޯބި އަދި އެކްޝަންވެސް ހިމެނޭ ފިލްމު "ނީނާ "ގެ ވާހަކަ ލިޔެ ޑައިރެކްޓްކުރީ އިލްޔާސް ވަޙީދު (އިއްލެ) އެވެ. ފިލްމުގެ ވާހަކަ ބިނާކޮށްފައިވަނީ ހިތްވަރުގަދަ އަންހެނަކު އޭނާގެ ދިރިއުޅުމުގައި ދިމާވާ ކަންތައްތަކާ ކުރިމަތިލާގޮތުގެ މައްޗަށެވެ. "އަންހެނުންނަކީ ފިސާރި ބާރުގަދަ ބައެއްކަން" މި ފިލްމުން އެނގޭނެކަމަށް ފިލްމުގެ ޓީމުން ވަނީ ބުނެފައެވެ.

"ނީނާ"ގެ ރޯލުން ފެނިގެންދާނީ ނުޒުޙަތު ޝުޢައިބެވެ. ފިރިހެން ލީޑް ރޯލުން ފެނިގެން ދާނީ ޝަރަފް ޢަބްދުﷲ އެވެ. ފިލްމުގައި ނުޒޫގެ މައިގަނޑު 3 ލުކެއް ފެނިގެންދެއެވެ.

ލީޑް ދެ ތަރިންގެ އިތުރުން ފިލްމުގެ މުހިއްމު ރޯލުތަކުން ފެނިގެންދިޔަ ބައެއް ފަންނާނުންގެ ތެރޭގައި މަރިޔަމް ރަޝީދާ، މަރިޔަމް ޝަކީލާ، އާދަމް ރިޒްވީ، ނަތާޝާ ޖަލީލް އަދި ޢަލީ އިނާޒް ހިމެނެއެވެ.