އދ. އަތޮޅު މިރިހި އައިލެންޑް ރިސޯޓް ކައިރީގައި އޮތް “ނޯތު 7” ނަމަކަށް ކިޔާ ސަފާރީއަކުން ދިވެއްސަކު މޫދަށް ވެއްޓި ގެއްލިފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ގެއްލިގެން ހޯދަމުން ދަނީ އެ ސަފާރީގެ ފަޅުވެރިއެއްގެ ގޮތުގައި މަސައްކަތް ކުރަމުން އައި، ނ. ހޮޅުދޫ، ސީވިޑް އަލީ އަރުޝަދު (35އ) ކަމަށެވެ. ފުލުހުންގެ އިދާރާއިން ވިދާޅުވެފައިވާ ގޮތުގައި އޭނާ ކަނޑަށް ވެއްޓިފައި ވަނީ ސަފާރީގެ ޑެކް މަތީގައި ހުއްޓައެވެ. އަދި އޭނާ ކަނޑަށް ވެއްޓިފައި ވަނީ ސަފާރީގެ ހަފޮޅުގައި ޖެހިފައި ކަމަށާއި، އޭނާ ވެއްޓޭ މަންޒަރު ސަފާރީގެ ސީސީޓީވީ ކެމެރާއަށް ރެކޯޑްކުރެވިފައި ހުރި ކަމުގައިވެސް ފުުލުހުންގެ އިދާރާއިން ހާމަކުރައްވާފައިވެއެވެ. 

ފުލުހުންގެ އުދާރާއިން ވިދާޅުވީ އަރުޝަދު ހޯދުމުގެ މަސައްކަތް ސިފައިން ކުރަމުންދާ ކަމަށެވެ. އެމްްއެންޑީއެފުން ވިދާޅުވީ، މިރިހި އައިލެންޑް ރިސޯޓް ކައިރީގައި އޮތް "ނޯތު 07" ސަފާރީއިން ދިވެއްސަކު ކަނޑަށް ވެއްޓި ގެއްލިގެން އުޅޭކަމުގެ މަޢުލޫމާތު އެމްއާރުސީސީއަށް ލިބުމާ ގުޅިގެން، ޑައިވަރުންގެ ޓީމަކުން އޭނާ ހޯދުމުގެ މަސައްކަތް މިހާރު ކުރަމުންދާކަމަށެވެ. އެހެން ނަމަވެސް މިހާތަނަށް އޭނާ ފެނިފައެއް ނުވެއެވެ.