ފްލެޓް ލިބޭ މީހުންގެ ދާއިމީ ލިސްޓު، ރަމަޟާން މަހުގެ ކުރިން އިޢުލާން ކުރެވޭނެ ކަމުގެ ބޮޑު ޔަޤީންކަމެއް އެބަ އޮތް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ހުވަދުއަތޮޅަށް ކުރެއްވި ރަސްމީ ދަތުރުފުޅު ނިންމަވާލެއްވުމުގެ ކުރިން ރާއްޖޭގެ ބައެއް މީޑިއާތަކަށް ދެއްވި ބަސްދީގަތުމުގައެވެ. ރައީސުލްޖުމްހޫރިއްޔާ ވިދާޅުވީ، އަލަށް އެމަނިކުފާނު ގެނައި ބަދަލުގެތެރެއިން ހައުސިންގ މިނިސްޓްރީގެ މަސައްކަތް މިހާރު ވަނީ މިނިސްޓަރ މުއްޠަލިބުގެ މެންޑޭޓްގެ ތެރެއަށް ލެވިފައިކަމަށެވެ. އަދި މިދިޔަ އަހަރެއްހާ ދުވަހުގެ ތެރޭގައި އެދިޔަ މަސައްކަތްތައްވެސް ރިވިއުކޮށް އެމަނިކުފާނު ވަޢުދުވެވަޑައިގެންފައި އޮތް ގޮތަށް އެކަން ކުރުމުގެ މަސައްކަތް މިހާރު ދަނީ ކުރިޔަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވިދާޅުވީ، ބަޔަަކަށް ލިބިފައި އޮތް ފްލެޓެއް އަތުލުމުގެ ވިސްނުންފުޅެއް ނުގެންގުޅުއްވާކަމަށެވެ. މީގެ އިތުރުން އެމަނިކުފާނު ވިދާޅުވީ، ބޯހިޔާވަހިކަމުގެ މުހިއްމު ހުރިހާ މަޝްރޫޢުއެއް މިމަހުގެ ތެރޭގައި އިޢުލާނުކުރައްވައި، ކޮންޓްރެކްޓަރުން ހޯއްދެވުމުގެ މަސައްކަތްވެސް ފައްޓަވާނެ ކަމަށެވެ. މިއަހަރުގެ ބަޖެޓުގެ 1.5 ބިލިޔަން ރުފިޔާ ކަނޑައަޅުއްވާފައި ވަނީ ބޯހިޔާވަހި ކަމުގެ މަޝްރޫޢުތަކަށެވެ.