ކުރީ ސަރުކާރުގައި ޤައުމީ އެއާލައިން މޯލްޑިވިއަންއަށް ފައިދާއެއް ނުވާކަމަށް ވިދާޅުވެ މިހާރުގެ ޓްރާންސްޕޯޓް މިނިސްޓަރ މުަހައްމަދު އަމީން ދެއްކެވި ވާހަކަފުޅަށް ހުޅުމާލެ ދެކުނުދާއިރާގެ މެމްބަރު ޑރ. އަޙްމަދު ޝަމްހީދު ރައްދު ދެއްވައިފިއެވެ.

ޑރ. ޝަމްހީދު ރައްދު ދެއްވާފައި ވަނީ، މޯލްޑިވިއަންއަށް ވައިޑްބޮޑި އެއާކްރާފްޓެއް ގެނައުމާއި ގުޅިގެން އެކަން ފާހަގަކުރެއްވުމަށް ބޭއްވި ރަސްމިއްޔާތުގައި ޓްރާންސްޕޯޓް މިނިސްޓަރު އަމީން ދެއްކެވި ވާހަކަފުޅާއި ގުޅިގެންނެވެ. އަމީން ވިދާޅުވެފައިވަނީ ނިމިދިޔަ 5 އަހަރު މޯލްޑިވިއަންއަށް ކުރިއެރުމަށް އައިސްފައި ނުވާ ކަމަށެވެ. އެހެން ނަމަވެސް ހޯމަދުވަހު މޯލްޑިވިއަންއަށް ވައިޑްބޮޑި އެއާކްރާފްޓެއް ގެނައި އިރު އެކަމަކީވެސް މިދިޔަ ސަރުކާރުގައި ފަށައިގެން ކުރިޔަށް ގެންދިޔަ މަސައްކަތެކެވެ.

މެމްބަރު ޝަމްހީދު ވިދާޅުވީ، މިނިސްޓަރ އަމީން ސުޓޭޖަށް އަރުއްވައި އިތުރުފުޅު ހައްދަވާނެ ކަމެއް ނެތް ކަމަށެވެ. އެމްޑީޕީ ސަރުކާރުގެ ފަހުކުއާޓާގެ ފައިނޭނަޟަލް ރިޕޯޓް ބައްލަވާލެއްވީމާ މޯލްޑިވިއަންއަށް ފަހު ކުއާޓާގައި ފައިދާވެފައިވާ ކުންފުންޏަކަށް ވެފައިވާތަން ފެނިވަޑައިގަންނަވާނެ ކަމުގައިވެސް މެމްބަރު ޝަމްހީދު ވިދާޅުވިއެވެ. 

ޝަމްހީދު ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ދައުރު ނިމުނު އިރު، ކޯޕޮރޭޓް ކޮމްޕުލައިންސް އިން ފުލުގަ ކުރިން އޮތް ކުންފުނި ވަނީ ސީޖީ ކޯޑުގެ އެންމެމަތީން މާކުސް ހޯދާފައި ކަމަށެވެ.

މޯލްޑިވިއަންއަށް ވައިޑްބޮޑީ އެއާކްރާފްޓެއް ގެނައުމަކީ، މިސަރުކާރަށް ހޯދުނު ކާމިޔާބީއެއްގެ ގޮތުގައި ސިފަކޮށް ސަރުކާރުން ވަނީ ހޯމަދުވަހު އެކަމުގެ ކާމިޔާބީ ފާހަގަކޮށްފައެވެ.