ކޯޓު އަމުރެއްގެ ދަށުން، ފުލުހުންގެ ބެލުމުގެ ދަށުން ކުރީގެ ނައިބުރައީސް ޢަބްދުﷲ ޖިހާދު ހައިކޯޓަށް ހާޟިރުކޮށް އެމަނިކުފާނުގެ މައްޗަށް ދައުލަތުން އުފުލާފައިވާ ދައުވާގެ ލިޔެކިޔުންތައް ހަވާލުކޮށްފިއެވެ.

ކުރީގެ ނައިބު ރައީސް ޖިހާދާއި ހަވާލުކުރައްވާފައި ވަނީ، 2013 ވަނަ އަހަރު ފިނޭންސް މިނިސްޓަރު ކަމުގެ މަޤާމުގައި ހުންނަވައިގެން ޖިހާދު ފަޅެއް ބަޔަކަށް ދޫކުރެއްވުމުގައި ދައުލަތަށް ގެއްލުންވާގޮތަށް އަމަލުކޮށްފައިވާތީ އެކަމާއި ގުޅިގެން ދައުލަތުން ހުށައެޅި ދައުވާގެ އިސްތިއުނާފު މަރުހަލާގެ ދައުވާގެ ލިޔެކިޔުންތަކެވެ. އެމައްސަލައިގައި ދައުލަތުން ކުރިމިނަލްކޯޓުގައި ކުރި ދައުވާ އެކޯޓުން ވަނީ ބޭރުކޮށްލާފައެވެ. އެހެންކަމުން މިހާރު ހައިކޯޓުގައި ފެށުމަށްތައްޔާރުވެފައި ވަނީ އެ މައްސަލައިގައި ދައުލަތުން ކުރާ އިސްތިއުނާފުގެ ޝަރީއަތްތަަކެވެ. އެހެން ނަމަވެސް ދައުވާ ރައްދުވާ ކުރީގެ ނައިބު ރައީސް ޢަބްދުﷲ ޖިހާދަށް ޗިޓު ރައްދުކުރެވިފައި ނުވާތީ އެމައްސަލައިގެ އަޑުއެހުންތައް އޮތީ ކުރިޔަށް ނުގެންދެވިފައެވެ. 

ކުރީގެ ނައިބު ރައީސްގެ މައްޗަށް ދައުލަތުން ކުރާ، ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ދައުވާގެ އިސްތިއުނާފް މައްސަލައިގެ އަޑުއެހުން ހައިކޯޓުގައި ބާއްވާފައި ވަނީ އިއްޔެއެވެ. ހައިކޯޓުގެ އަޑުއެހުމުގައި ޖިހާދު ވިދާޅުވީ، ކޯޓަށް ހާޟިރުވުމުގެ އަމުރެއް ލިބިވަޑައި ނުގަންނަވާ ކަމަށާއި މިދިޔަ ބުރާސްފަތި ދުވަހާއި ހަމައަށް އެމަނިކުފާނު ހުންނެވީ ރާއްޖެއިން ބޭރުގައި ކަމަށެވެ. އަދި އޭނާގެ މައްޗަށް ދައުވާކުރާ އެމައްސަލައިގައި ކުރިޔަށްދާން ބޭނުންވަނީ ވަކީލަކާއި އެކުގައި ކަމަށްވާތީ އެކަމަށް 5 ދުވަހުގެ މުހުލަތެއް ދެއްވުމަށް އެދޭ ކަމަށެވެ. އެހެން ނަމަވެސް 5 ދުވަހުގެ މުއްދަތެއް ދެވެން ނެތްކަމުގައި ޝަރީޢަތުގެ މަޖިލީހުން ވަނީ އަންގަވާފައެވެ.